ധനുഷിനെ പ്രണയിക്കാൻ പഠിപ്പിച്ച് നിത്യ മേനോൻ: ‘തിരുചിത്രമ്പലം’ റിലീസിന് ഒരുങ്ങുന്നു

ധനുഷ് നായകനാകുന്ന ഏറ്റവും പുതിയ ചിത്രമാണ് ‘തിരുചിത്രമ്പലം’. ഡെലിവറി ബോയ് ആയ തിരുചിത്രമ്പലം എന്ന കഥാപാത്രത്തെയാണ് ധനുഷ് ചിത്രത്തിൽ അവതരിപ്പിക്കുന്നത്. മിത്രൻ ജവഹർ ആണ് ചിത്രം സംവിധാനം ചെയ്യുന്നത്. വർഷ ഭരത്, ശ്രേയസ് ശ്രീനിവാസൻ എന്നിവരുമായി ചേർന്ന് മിത്രൻ ജവഹർ തന്നെയാണ് ചിത്രത്തിന് തിരക്കഥ ഒരുക്കിയിരിക്കുന്നത്. പഴം എന്ന് വിളിക്കുന്ന തിരുചിത്രമ്പലത്തിന്റെ നർമ്മവും പ്രണയവും സൗഹൃദവും നിറഞ്ഞ ജീവിതമാണ് ചിത്രം പറയുന്നത്. ആ​ഗസ്റ്റ് 18ന് സിനിമ തിയേറ്ററിലെത്തും.

Also Read: പുതുമുഖങ്ങൾ അണിനിരക്കുന്ന സസ്പെൻസ് ത്രില്ലർ ചിത്രം റെഡ് ഷാഡോ പൂർത്തിയായി

നിത്യ മേനോൻ, റാഷി ഖന്ന, പ്രിയ ഭവാനി ശങ്കർ എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്. സൺ പിക്ചേഴ്‍സിന്റെ ബാനറിൽ കലാനിധി മാരൻ ആണ് ചിത്രം നിർമ്മിക്കുന്നത്. അനിരുദ്ധ് രവിചന്ദർ ആണ് ചിത്രത്തിന്റെ സംഗീത സംവിധാനം നിർവ്വഹിക്കുന്നത്. ‘യാരടി നീ മോഹനി’ എന്ന ചിത്രത്തിന് ശേഷം ധനുഷും മിത്രൻ ജവഹറും ഒന്നിക്കുന്ന ചിത്രം കൂടിയാണിത്.

കഴിഞ്ഞ ദിവസമാണ് സിനിമയുടെ ട്രെയ്‍ലർ പുറത്ത് വന്നത്. ‘തിരുചിത്രമ്പലം’ രസിപ്പിക്കുന്ന ഒരു ചിത്രമായിരിക്കും എന്ന സൂചനയാണ് ട്രെയ്‍ലർ നൽകുന്നത്. മികച്ച പ്രതികരണമാണ് ട്രെയ്‍ലറിന് ലഭിക്കുന്നത്.