ധനുഷിന്റെ തിരുച്ചിത്രമ്പലം റിലീസിന് ഒരുങ്ങുന്നു: സിനിമ കേരളത്തിലെത്തിക്കുന്നത് ലിസ്റ്റിൻ സ്റ്റീഫൻ

ധനുഷിനെ നായകനാക്കി മിത്രൻ ജവഹർ സംവിധാനം ചെയ്യുന്ന ചിത്രമാണ് തിരുച്ചിത്രമ്പലം. യാരടി നീ മോഹിനി എന്ന ചിത്രത്തിന് ശേഷം ധനുഷും മിത്രൻ ജവഹറും ഒന്നിക്കുന്ന സിനിമ കൂടിയാണിത്. റാഷി ഖന്ന, പ്രിയ ഭവാനി ശങ്കര്‍, നിത്യ മേനോൻ, പ്രകാശ് രാജ് എന്നിവരാണ് സിനിമയിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. സിനിമ ആഗസ്റ്റ് 18ന് തിയേറ്ററുകളിൽ റിലീസ് ചെയ്യും.

Also Read: ഒറ്റയ്ക്ക് ഒരു സിനിമ വിജയിപ്പിക്കാൻ കഴിയുന്ന നടിമാർക്ക് തുല്യ പ്രതിഫലം നൽകാം: ധ്യാൻ ശ്രീനിവാസൻ

ഇപ്പോളിതാ, സിനിമയുടെ കേരളത്തിലെ വിതരണാവകാശം സ്വന്തമാക്കിയിരിക്കുകയാണ് ലിസ്റ്റിൻ സ്റ്റീഫന്റെ മാജിക് ഫ്രെയിംസ്. ലിസ്റ്റിൻ തന്നെയാണ് ഇക്കാര്യം സമൂഹ മാധ്യമങ്ങളിലൂടെ അറിയിച്ചത്. റെഡ് ജയന്റ് മൂവീസാണ് തമിഴ്നാട്ടിൽ ചിത്രം വിതരണം ചെയ്യുന്നത്.

വര്‍ഷ ഭരത്, ശ്രേയസ് ശ്രീനിവാസൻ, മിത്രൻ ജവഹര്‍ എന്നിവർ ചേർന്നാണ് ചിത്രത്തിന്റെ തിരക്കഥ ഒരുക്കുന്നത്. സണ്‍ പിക്ചേഴ്സിന്റെ ബാനറിൽ കലാനിധി മാരൻ ആണ് ചിത്രം നിര്‍മ്മിക്കുന്നത്. ചിത്രത്തിലെ ​ഗാനങ്ങൾക്ക് സം​ഗീതം പകരുന്നത് അനിരുദ്ധ് ആണ്. ഓം പ്രകാശ് ആണ് സിനിമയ്ക്ക് വേണ്ടി ക്യാമറ ചലിപ്പിക്കുന്നത്.