സുരേഷ് ഗോപിയുടെ തിരിച്ചുവരവ്: ബോക്സ് ഓഫീസിൽ കുതിച്ച് പാപ്പൻ

ജോഷിയുടെ സംവിധാനത്തിൽ ഒരുങ്ങിയ സുരേഷ് ഗോപി ചിത്രം പാപ്പൻ രണ്ടാം വാരത്തിലേക്ക് കടക്കുമ്പോഴും വിജയക്കുതിപ്പ് തുടരുന്നു. റിലീസ് ദിനത്തിൽ കേരളത്തിൽ നിന്ന് ചിത്രം നേടിയത് 3.16 കോടി ആയിരുന്നു. രണ്ടാം ദിനത്തിൽ 3.87 കോടിയും മൂന്നാം ദിനത്തിൽ 4.53 കോടിയും നേടി. നാലാം ദിനമായ തിങ്കളാഴ്ച 1.72 കോടിയാണ് സിനിമ നേടിയത്. ഇപ്പോളിതാ, കേരളത്തിൽ നിന്ന് ചിത്രം ഒരാഴ്ച നേടിയ കളക്ഷനുമായി ബന്ധപ്പെട്ട വിവരങ്ങൾ പുറത്ത് വിട്ടിരിക്കുകയാണ് അണിയറ പ്രവർത്തകർ. 17.85 കോടിയാണ് ചിത്രത്തിന്റെ ഒരാഴ്ചത്തെ കേരള ഗ്രോസ് എന്നാണ് പുറത്തെത്തിയ കണക്ക്.

Also Read: സിനിമ സുരക്ഷിതമായ ഇടമാണെന്നാണ് തോന്നിയത്, സെറ്റിൽ വലിയ കെയറിങ് തോന്നാറുണ്ട്: ഇനിയ

സുരേഷ് ഗോപിയുടെ കരിയറിലെ 252-ാമത്തെ ചിത്രമായി എത്തിയ പാപ്പൻ കേരളത്തിൽ മാത്രമാണ് തുടക്കത്തിൽ റിലീസ് ചെയ്യപ്പെട്ടത്. ജൂലൈ 29നായിരുന്നു സിനിമ കേരളത്തിൽ റിലീസ് ചെയ്തത്. യുഎഇ, ജിസിസി, യുഎസ് അടക്കമുള്ള വിദേശ മാർക്കറ്റുകളിലെയും ഒപ്പം ഇന്ത്യയിലെ മറ്റു സംസ്ഥാനങ്ങളിലെയും റിലീസ് ഈ വാരാന്ത്യത്തിലാണ്. ഗൾഫ് രാജ്യങ്ങളിൽ മാത്രം 108 സ്ക്രീനുകളിലാണ് ചിത്രം പ്രദർശനത്തിനെത്തുക. സമീപകാലത്ത് ഒരു മലയാള ചിത്രത്തിന് ലഭിക്കുന്ന ഏറ്റവും ഉയർന്ന സ്ക്രീൻ കൗണ്ട് ആണിത്. അമേരിക്കയിൽ 62 തിയേറ്ററുകളിൽ ചിത്രം പ്രദർശനത്തിനെത്തും.

വർഷങ്ങൾക്ക് ശേഷം സുരേഷ് ​ഗോപി പൊലീസ് വേഷത്തിലെത്തിയ ചിത്രമായിരുന്നു പാപ്പൻ. ആർ ജെ ഷാൻ ആണ് ചിത്രത്തിന്റെ രചന നിർവ്വഹിച്ചത്. ഗോകുലം ഗോപാലൻ, ഡേവിഡ് കാച്ചപ്പിള്ളി, റാഫി മതിര എന്നിവർ ചേർന്നാണ് സിനിമ നിർമ്മിച്ചിരുക്കുന്നത്.