ധനുഷിനെ കേന്ദ്ര കഥാപാത്രമാക്കി സെൽവരാഘവൻ ഒരുക്കുന്ന ചിത്രമാണ് ‘നാനേ വരുവേൻ’. ഏറെ പ്രതീക്ഷയോടെയാണ് ധനുഷ് ആരാധകർ ചിത്രത്തിനായി കാത്തിരിക്കുന്നത്. ഇപ്പോളിതാ, സിനിമയുടെ ഫസ്റ്റ് ലുക്ക് പോസ്റ്റർ പുറത്ത് വിട്ടിരിക്കുകയാണ് അണിയറ പ്രവർത്തകർ. ധനുഷിന്റെ ജന്മദിനത്തോട് അനുബന്ധിച്ചാണ് പോസ്റ്റർ റിലീസ് ചെയ്തത്. ധനുഷിന്റെ സഹോദരനും ചിത്രത്തിന്റെ സംവിധായകനുമായ സെൽവരാഘവൻ തന്നെയാണ് സമൂഹ മാധ്യമങ്ങളിലൂടെ പോസ്റ്റർ പങ്കുവച്ചത്. ധനുഷിന് ജന്മദിനാശംസകളുമായാണ് സെൽവരാഘവൻ പോസ്റ്റർ പുറത്തുവിട്ടത്. സെൽവരാഘവനും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട്.
Also Read: ജോണ്‍ എബ്രഹാമിന്റെ ‘ഏക് വില്ലൻ റിട്ടേണ്‍സ്’ നാളെ മുതൽ
‘മേയാത മാൻ’ എന്ന ചിത്രത്തിലൂടെ തമിഴകത്ത് എത്തിയ ഇന്ദുജയാണ് ചിത്രത്തിൽ നായികയായെത്തുന്നത്. യുവാൻ ശങ്കർ രാജയാണ് ചിത്രത്തിന്റെ സംഗീത സംവിധായകൻ. സെൽവരാഘവൻ കേന്ദ്ര കഥാപാത്രമായി എത്തിയ ‘സാനി കായിദ’ത്തിന്റെ ക്യാമറ കൈകാര്യം ചെയ്‍ത യാമിനി യജ്ഞമൂർത്തിയാണ് ഛായാഗ്രഹണം നിർവ്വഹിക്കുന്നത്. വി ക്രിയേഷൻസിൻറെ ബാനറിൽ കലൈപ്പുലി എസ് താണുവാണ് ചിത്രം നിർമ്മിക്കുന്നത്.
ധനുഷ് നായകനായി ഇനി റിലീസ് ചെയ്യാനുള്ള ചിത്രം ‘തിരുചിത്രമ്പലം’ ആണ്. മിത്രൻ ജവഹർ ആണ് ചിത്രം സംവിധാനം ചെയ്യുന്നത്. നിത്യാ മേനോൻ, റാഷി ഖന്ന, പ്രിയ ഭവാനി ശങ്കർ എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്. കലാനിധി മാരൻ ആണ് ചിത്രം നിർമ്മിക്കുന്നത്.
Post Your Comments