റാമിന്റെ കത്തുമായി സീതയെ തേടി അഫ്രീൻ നടത്തുന്ന യാത്ര: സീതാരാമം ട്രെയ്‍ലർ പങ്കുവച്ച് മമ്മൂട്ടി

ദുൽഖർ സൽമാൻ നായകനാവുന്ന സീതാരാമം എന്ന ചിത്രത്തിന്റെ മലയാളം പതിപ്പിന്റെ ട്രെയ്‍ലർ റിലീസ് ചെയ്തു. മമ്മൂട്ടി ആണ് സമൂഹ മാധ്യമങ്ങളിലൂടെ ട്രെയ്‌ലർ പുറത്തിറക്കിയത്. ഹാനു രാഘവപുഡിയാണ് ഈ ബിഗ് ബജറ്റ് ചിത്രത്തിന്റെ സംവിധായകൻ. വൈജയന്തി മൂവീസിന്റെ ബാനറിൽ അശ്വിനി ദത്തും പ്രിയങ്ക ദത്തും ചേർന്നാണ് നിർമ്മാണം.

Also Read: കമൽ ഹാസൻ അമേരിക്കയിലേക്ക്: അണിയറയിൽ ഇന്ത്യൻ 2 ഒരുങ്ങുന്നതായി റിപ്പോർട്ട്

1965ൽ റാം എന്ന പട്ടാളക്കാരനും സീത എന്ന പെൺകുട്ടിയും തമ്മിലുണ്ടാകുന്ന പ്രണയവും റാം എഴുതിയ കത്തുമായി സീതയെ തേടി അഫ്രീൻ നടത്തുന്ന യാത്രയുമാണ് സിനിമ പറയുന്നത്. ദുൽഖർ സൽമാനും മൃണാൽ താക്കൂറുമാണ് റാം ആയും സീതയായും എത്തുന്നത്. രശ്മിക മന്ദാനയാണ് അഫ്രീനായി അഭിനയിക്കുന്നത്.

തെലുങ്ക്, തമിഴ്, മലയാളം എന്നീ ഭാഷകളിലാണ് ചിത്രം റിലീസ് ചെയ്യുന്നത്. പി എസ് വിനോദ് ആണ് ഛായാഗ്രഹണം നിർവ്വഹിക്കുന്നത്. സുമന്ത്, ഗൗതം മേനോൻ, പ്രകാശ് രാജ്, തരുൺ ഭാസ്‌ക്കർ, ശത്രു, ഭൂമിക ചൗള, രുക്മിണി വിജയ് കുമാർ, സച്ചിൻ ഖേദേക്കർ, മുരളി ശർമ്മ, വെണ്ണല കിഷോർ എന്നിങ്ങനെ ഒരു വമ്പൻ താരനിര തന്നെ ചിത്രത്തിൽ അണിനിരക്കുന്നുണ്ട്.