കമൽ ഹാസൻ അമേരിക്കയിലേക്ക്: അണിയറയിൽ ഇന്ത്യൻ 2 ഒരുങ്ങുന്നതായി റിപ്പോർട്ട്

1996ലാണ് കമൽ ഹാസൻ – ശങ്കർ ടീമിന്റെ ഇന്ത്യൻ തിയേറ്ററുകളിലെത്തിയത്. കമൽ ഹാസൻ ഇരട്ടവേഷത്തിൽ എത്തിയ ചിത്രം 1996ലെ ഓസ്കർ പുരസ്കാരത്തിനുള്ള ഇന്ത്യയുടെ ഔദ്യോഗിക എൻട്രിയായിരുന്നു. വമ്പൻ വിജയം നേടിയ ചിത്രത്തിന്റെ രണ്ടാം ഭാഗമായ ഇന്ത്യൻ 2വിന് വേണ്ടി ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്.

Also Read: കുഞ്ചാക്കോ ബോബന്റെ വൈറൽ ഡാൻസ് അനുകരിച്ച് ദുൽഖർ സൽമാൻ

ഇപ്പോളിതാ, ഏറെ നാളുകളായി മുടങ്ങി കിടക്കുന്ന ഇന്ത്യൻ 2 എന്ന സിനിമയുടെ ചിത്രീകരണത്തിന് മുൻപുള്ള ഒരുക്കങ്ങൾക്കായി കമൽ ഹാസൻ ഉടൻ അമേരിക്കയിലേക്ക് പോകും എന്ന റിപ്പോർട്ടുകളാണ് പുറത്ത് വരുന്നത്. സിനിമയുടെ ചിത്രീകരണം സെപ്റ്റംബറിൽ ആരംഭിക്കുമെന്നും സൂചനകളുണ്ട്.

2019ലാണ് ഇന്ത്യൻ 2വിന്റെ ചിത്രീകരണം ആരംഭിച്ചത്. എന്നാൽ, പലകാരണങ്ങളാൽ തുടർന്നുള്ള ഷൂട്ടിം​ഗ് വൈകി. ചിത്രത്തിന്റെ ഒരു ഷെഡ്യൂൾ നേരത്തെ ചെന്നൈയിൽ പൂർത്തിയാക്കിയിരുന്നു. 200 കോടി രൂപ ബജറ്റിൽ ഒരുക്കുന്ന ചിത്രത്തിൽ കാജൽ അഗർവാളാണ് നായിക. ഐശ്വര്യ രാജേഷും പ്രിയ ഭവാനിയും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്.