വിജയ് സേതുപതി ആദ്യമായി നായക വേഷം കൈകാര്യം ചെയ്യുന്ന മലയാള ചിത്രമാണ് 19(1)(എ). കേരളത്തിൽ താമസിക്കുന്ന ഒരു തമിഴ് എഴുത്തുകാരനെയാണ് വിജയ് സേതുപതി ചിത്രത്തിൽ അവതരിപ്പിക്കുന്നത്. നവാഗതയായ ഇന്ദു വി എസ് ആണ് ചിത്രം സംവിധാനം ചെയ്യുന്നത്. ഒടിടി പ്ലാറ്റ്‍ഫോമായ ഡിസ്നി പ്ലസ് ഹോട്ട്സ്റ്റാറിലൂടെയാണ് ചിത്രം പ്രേക്ഷകരിലേക്ക് എത്തുക. റിലീസ് തിയതി ഉടനെ പ്രഖ്യാപിക്കും. നിത്യ മേനോനാണ് ചിത്രത്തിൽ നായികയായെത്തുന്നത്.
ഇപ്പോളിതാ, ചിത്രത്തിന്റെ ടീസർ റിലീസ് ചെയ്തിരിക്കുകയാണ് അണിയറ പ്രവർത്തകർ. 58 സെക്കന്റുകൾ ദൈർഘ്യമുള്ള ടീസറാണ് ഡിസ്നി പ്ലസ് ഹോട്ട്സ്റ്റാർ മലയാളം എന്ന യൂട്യുബ് ചാനലിലൂടെ പുറത്ത് വിട്ടിരിക്കുന്നത്. ഏറെ വൈകാരികമായ ഒരു കഥയാണ് സിനിമ പറയുന്നത് എന്നാണ് ടീസർ നൽകുന്ന സൂചന. പൊളിറ്റിക്കൽ ഡ്രാമ വിഭാഗത്തിലാണ് സിനിമ ഒരുങ്ങുന്നത്. ഇന്ദ്രൻസ്, ഇന്ദ്രജിത്ത് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
ആന്റോ ജോസഫും നീത പിന്റോയും ചേർന്നാണ് സിനിമ നിർമ്മിക്കുന്നത്. ഗോവിന്ദ് വസന്തയാണ് സംഗീത സംവിധാനം നിർവ്വഹിച്ചിരിക്കുന്നത്. മനേഷ് മാധവനാണ് ഛായാഗ്രഹണം. വിജയ് ശങ്കറാണ് ചിത്രത്തിന്റെ എഡിറ്റിംഗ് നിർവ്വഹിക്കുന്നത്.
ഇത് രണ്ടാം തവണയാണ് വിജയ് സേതുപതി മലയാള സിനിമയിൽ എത്തുന്നത്. ജയറാം നായകനായി എത്തിയ മർക്കോണി മത്തായിയിൽ വിജയ് സേതുപതി അതിഥി വേഷത്തിൽ എത്തിയിരുന്നു.
Post Your Comments