മമ്മൂട്ടിയുടെ തെലുങ്ക് ചിത്രം: ത്രില്ലടിപ്പിച്ച് ഏജന്റ് ടീസർ

തെന്നിന്ത്യൻ യുവ താരം അഖിൽ അക്കിനേനിയും മലയാളത്തിന്റെ മെഗാ സ്റ്റാർ മമ്മൂട്ടിയും ഒന്നിക്കുന്ന ചിത്രമാണ് ഏജന്റ്. സുരേന്ദർ റെഡ്ഡിയാണ് ചിത്രത്തിന്റെ രചനയും സംവിധാനവും നിർവ്വഹിക്കുന്നത്. ഇപ്പോളിതാ, ചിത്രത്തിന്റെ ടീസർ പുറത്ത് വിട്ടിരിക്കുകയാണ് അണിയറ പ്രവർത്തകർ. എകെ എന്റർടെയ്ൻമെൻസിന്റെ യൂട്യൂബ് ചാനലിലൂടെയാണ് ടീസർ റിലീസ് ചെയ്തത്. മമ്മൂട്ടിയുടെ ശക്തമായ സാന്നിധ്യം തന്നെയാണ് ടീസറിന്റെ ഏറ്റവും വലിയ പ്രത്യേകത. ഒരു മികച്ച ആക്ഷൻ എന്റർടെയ്നർ തന്നെയായിരിക്കും സിനിമ എന്നാണ് ടീസർ നൽകുന്ന സൂചന.

Also Read: എന്റെ ഹീറോ ആയിരുന്നു ആ മനുഷ്യൻ, നിരവധി നല്ലോർമ്മകൾ ബാക്കിവച്ച് അയാൾ പോയി: പ്രതാപ് പോത്തനെ കുറിച്ച് ലാൽ ജോസ്

തെലുങ്ക്, ഹിന്ദി, തമിഴ്, കന്നഡ, മലയാളം ഭാഷകളിൽ ഒരേസമയം സിനിമ റിലീസ് ചെയ്യും. എകെ എന്റർടെൻമെന്റ്‌സിന്റെയും സുരേന്ദർ 2 സിനിമയുടെയും ബാനറിൽ രാമബ്രഹ്മം സുങ്കരയാണ് ചിത്രം നിർമ്മിക്കുന്നത്. അഖിൽ അക്കിനേനിയാണ് സിനിമയിലെ നായക കഥാപാത്രത്തെ അവതരിപ്പിക്കുന്നത്. ചിത്രത്തിൽ മഹാദേവ് എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. 25 മിനിറ്റിനടുത്ത് ദൈർഘ്യമുളള അതിഥി വേഷത്തിലാകും നടൻ എത്തുക എന്ന സൂചനകളും പുറത്ത് വരുന്നുണ്ട്. മമ്മൂട്ടിയുടെ രണ്ടാമത്തെ തെലുങ്ക് ചിത്രമാണിത്.

നവാഗതയായ സാക്ഷി വൈദ്യയാണ് അഖിലിന്റെ നായികയായി എത്തുന്നത്. വക്കന്തം വംശിയാണ് ചിത്രത്തിന് തിരക്കഥ ഒരുക്കിയിരിക്കുന്നത്. സിനിമ ഓഗസ്റ്റ് 12ന് തിയേറ്ററുകളിലെത്തും.