പ്രണയ കഥയുമായി ഷെയ്നും പവിത്രയും: ഉല്ലാസം ഇന്ന് മുതൽ

ഷെയ്ൻ നിഗത്തെ നായകനാക്കി നവാഗതനായ ജീവൻ ജോജോ സംവിധാനം ചെയ്യുന്ന ഉല്ലാസം ഇന്ന് മുതൽ തിയേറ്ററുകളിൽ പ്രദർശനം തുടങ്ങും. 150 തിയേറ്ററുകളിലാണ് ചിത്രം റിലീസിനെത്തുന്നത്. പ്രണയവും യാത്രയും തമാശയും പ്രമേയമാക്കിയാണ് ചിത്രം ഒരുങ്ങുന്നത്. പരസ്യ ചിത്രങ്ങളിലൂടെയും ഷോർട്ട് ഫിലിമുകളിലൂടെയും ശ്രദ്ധേയായ പവിത്ര ലക്ഷ്മിയാണ് ചിത്രത്തിൽ നായികയായെത്തുന്നത്.

നേരത്തെ റിലീസ് ചെയ്ത ചിത്രത്തിന്റെ ടീസറും ട്രെയ്‍ലറും മികച്ച പ്രതികരണമാണ് നേടിയത്. ചിത്രത്തിലെ ​ഗാനങ്ങളും പ്രേക്ഷകർ ഏറ്റെടുത്തിരുന്നു. പൂർണമായും ഊട്ടിയിലാണ് സിനിമ ചിത്രീകരിച്ചിരിക്കുന്നത്. ഇതുവരെ കണ്ടതിൽ നിന്നും വ്യത്യസ്‍തമായ രൂപത്തിലും ഭാവത്തിലുമാണ് ഷെയിൻ നിഗം ചിത്രത്തിലെത്തുന്നത്. സംഗീതത്തിനും നൃത്തത്തിനും ഏറെ പ്രാധാന്യമുള്ള ഈ ചിത്രത്തിൽ ബി കെ ഹരിനാരായണൻറെ വരികൾക്ക് ഷാൻ റഹ്‍മാൻ ഈണം പകരുന്നു.

Also Read: ‘ഞാൻ ബാറ്റ്മാനാകാം, അദ്ദേഹം തന്നെ സംവിധാനം ചെയ്യണം’

കൈതമറ്റം ബ്രദേഴ്‌സിന്റെ ബാനറിൽ ജോ കൈതമറ്റം, ക്രിസ്റ്റി കൈതമറ്റം എന്നിവർ ചേർന്ന് നിർമ്മാണം. പ്രവീൺ ബാലകൃഷ്ണനാണ് ചിത്രത്തിന് വേണ്ടി തിരക്കഥ ഒരുക്കിയിരിക്കുന്നത്. അരവിന്ദന്റെ അതിഥികൾ എന്ന ചിത്രത്തിലൂടെ ശ്രദ്ധേയനായ സ്വരൂപ് ഫിലിപ്പാണ് ഛായാഗ്രഹണം നിർവ്വഹിക്കുന്നത്. അജു വർഗീസ്, ദീപക് പരമ്പോൽ, ബേസിൽ ജോസഫ്, ലിഷോയ്, അപ്പുകുട്ടി, ജോജി, അംബിക, നയന എൽസ, തുടങ്ങിയവരും ചിത്രത്തിൽ അണിനിരക്കുന്നുണ്ട്.