മമ്മൂട്ടിയെ കേന്ദ്ര കഥാപാത്രമാക്കി നിസാം ബഷീർ സംവിധാനം ചെയ്യുന്ന ചിത്രമാണ് റോഷാക്ക്. കെട്ട്യോളാണെന്റെ മാലാഖയ്ക്ക് ശേഷം നിസാം ഒരുക്കുന്ന ചിത്രമാണിത്. ത്രില്ലർ വിഭാഗത്തിൽപ്പെടുന്ന ചിത്രം നിർമ്മിക്കുന്നത് മമ്മൂട്ടി കമ്പനിയാണ്. ഇപ്പോളിതാ, സിനിമയുടെ ചിത്രീകരണം പൂർത്തിയായെന്ന വാർത്തയാണ് വരുന്നത്. ദുബായിൽ ആയിരുന്നു അവസാന ഷെഡ്യൂൾ ഷൂട്ട് ചെയ്തത്. കൊച്ചിയിലാണ് ചിത്രത്തിന്റെ ഏറിയ പങ്കും ചിത്രീകരിച്ചത്. നാല് ദിവസം മുമ്പാണ് നിസാം ബഷീറും സംഘവും അവസാന ഷെഡ്യൂളിനായി ദുബായിലേയ്ക്ക് തിരിച്ചത്. അവിടെ മൂന്നു ദിവസത്തെ വർക്കുണ്ടായിരുന്നു. ചിത്രീകരണം പൂർത്തിയാക്കിയ സംഘം കേരളത്തിലേക്ക് തിരികെയെത്താൻ ഒരുങ്ങുകയാണ്.
Also Read: ഓരോ സിനിമയും ഓരോ പോരാട്ടങ്ങളാണ്: കുറിപ്പുമായി അടിത്തട്ട് സംവിധായകൻ
സമീർ അബ്ദുൾ ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. അഡ്വഞ്ചേഴ്സ് ഓഫ് ഓമനക്കുട്ടൻ, ഇബിലീസ് എന്നീ ചിത്രങ്ങളുടെ രചന നിർവ്വഹിച്ചതും സമീർ അബ്ദുൾ ആയിരുന്നു. നിമീഷ് രവിയാണ് സിനിമയ്ക്ക് വേണ്ടി ക്യാമറ ചലിപ്പിക്കുന്നത്. മിഥുൻ മുകുന്ദൻ ആണ് ചിത്രത്തിലെ ഗാനങ്ങൾക്ക് സംഗീതം പകരുന്നത്.
ഓണം റിലീസായി റോഷാക്ക് പ്രേക്ഷകർക്ക് മുന്നിൽ എത്തിക്കാനാണ് അണിയറ പ്രവർത്തകരുടെ ശ്രമം. ഷറഫുദ്ദീൻ, ജഗദീഷ്, ഗ്രേസ് ആന്റണി, ബിന്ദു പണിക്കർ, സഞ്ജു ശിവറാം, കോട്ടയം നസീർ, ബാബു അന്നൂർ, മണി ഷൊർണ്ണൂർ തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. അതിഥി താരമായി ആസിഫ് അലിയും ചിത്രത്തിൽ എത്തുന്നുണ്ട്.
Post Your Comments