വിജയ്‌യുടെ പുതിയ ചിത്രം ‘വാരിസു’: ഫസ്റ്റ് ലുക്ക് പുറത്ത്

ആരാധകർ ഏറെ പ്രതീക്ഷയോടെ കാത്തിരിക്കുന്ന വിജയ് ചിത്രം ‘ദളപതി 66’ന്റെ ടൈറ്റിൽ അണിയറ പ്രവർത്തകർ റിലീസ് ചെയ്തു. ‘വാരിസു’ എന്ന് പേരിട്ടിരിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്ററും പുറത്തിറക്കിയിട്ടുണ്ട്. ‘ബോസ് തിരിച്ചെത്തുന്നു’ എന്ന ടാഗ്‍ലൈനോടെയാണ് അണിയറ പ്രവർത്തകർ പോസ്റ്റർ പുറത്ത് വിട്ടത്. സ്യൂട്ട് അണിഞ്ഞിരിക്കുന്ന വിജയ് ആണ് പോസ്റ്ററിൽ പ്രത്യക്ഷപ്പെടുന്നത്. വംശി പൈഡിപ്പള്ളി സംവിധാനം ചെയ്യുന്ന ചിത്രത്തിന്റെ പോസ്റ്റർ ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു.

വിജയ്‍യുടെ കരിയറിലെ 66-മാത്തെ ചിത്രമാണിത്. തമിഴിലും തെലുങ്കിലുമായാണ് സിനിമ ഒരുക്കുന്നത്. ശ്രീ വെങ്കടേശ്വര ക്രിയേഷൻസിന്റെ ബാനറിൽ ദിൽ രാജു ആണ് ചിത്രം നിർമ്മിക്കുന്നത്. തമനാണ് ചിത്രത്തിനായി സംഗീതം നിർവ്വഹിക്കുന്നത്. പ്രകാശ് രാജും ചിത്രത്തിൽ പ്രധാന വേഷത്തിലെത്തും. 13 വർഷത്തിന് ശേഷം ഇരുവരും ഒന്നിക്കുന്ന ചിത്രമാണിത്. ‘ഗില്ലി’, ‘പോക്കിരി’, ‘വില്ല്’ തുടങ്ങിയ സൂപ്പർഹിറ്റ് ചിത്രങ്ങളിൽ ഇരുവരും ഒന്നിച്ച് അഭിനയിച്ചിരുന്നു.

Also Read: ‘ദ്രാവിഡ രാജകുമാരൻ’: ചിത്രീകരണം പൂർത്തിയായി

രശ്‌മിക മന്ദാനയാണ് ചിത്രത്തിൽ നായികയായെത്തുന്നത്. പ്രഭു, ജയസുധ, ശരത്കുമാർ, ഖുശ്ബു, ശ്രീകാന്ത്, ഷാം, സംഗീത കൃഷ്, സംയുക്ത, യോഗി ബാബു തുടങ്ങിയവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്.