വിജയ്‌യുടെ ‘ദളപതി 66’ ഒരുങ്ങുന്നു: ഫസ്റ്റ് ലുക്ക് താരത്തിന്റെ പിറന്നാൾ തലേന്ന് എത്തും

വിജയ് ആരാധകർ പ്രതീക്ഷയോടെ കാത്തിരിക്കുന്ന ചിത്രമാണ് ‘ദളപതി 66’. താരത്തിന്റെ കരിയറിലെ 66-ാംമത്തെ ചിത്രമാണിത്. പ്രശസ്ത തെലുങ്ക് സംവിധായകനായ വംശി പൈടിപ്പളിയാണ് ചിത്രം ഒരുക്കുന്നത്. രശ്മിക മന്ദാനയാണ് സിനിമയിൽ നായികയായെത്തുന്നത്. തമിഴിലും തെലുങ്കിലും പുറത്തിറങ്ങുന്ന ചിത്രത്തിന്റെ ഷൂട്ടിങ് നിലവിൽ ചെന്നൈയിൽ പുരോഗമിക്കുകയാണ്.

ഇപ്പോളിതാ, അടുത്ത ദിവസം തന്നെ ചിത്രത്തിന്റെ ഫസ്റ്റ് ലുക്ക് പുറത്ത് വിടുമെന്ന് അറിയിച്ചിരിക്കുകയാണ് അണിയറ പ്രവർത്തകർ. ഫസ്റ്റ് ലുക്ക് പോസ്റ്റർ ജൂൺ 21ന് റിലീസ് ചെയ്യുമെന്നാണ് ശ്രീ വെങ്കിടേശ്വര ക്രിയേഷൻസ് ട്വീറ്റ് ചെയ്തിരിക്കുന്നത്. വിജയ്‍യുടെ പിറന്നാൾ തലേന്നാണ് ഫസ്റ്റ് ലുക്ക് എത്തുന്നത്. ‘അവൻ വീണ്ടും വരുന്നു’ എന്ന അടിക്കുറിപ്പോടെയാണ് ഫസ്റ്റ് ലുക്ക് പോസ്റ്റർ പുറത്തിറക്കാൻ ഒരുങ്ങുന്ന വിവരം നിർമ്മാതാക്കൾ ട്വീറ്റ് ചെയ്തിരിക്കുന്നത്. ഫസ്റ്റ് ലുക്ക് റിലീസിന് മുന്നോടിയായി ഫസ്റ്റ് ലുക്കിന്റെ ടീസർ അണിയറ പ്രവർത്തകർ പുറത്ത് ഇറക്കിയിട്ടുണ്ട്.

Also Read: ഭാഷയ്ക്കപ്പുറം സിനിമയെ സ്നേഹിക്കുന്ന മലയാളികൾക്ക് നന്ദി: വിജയ് സേതുപതി

പ്രഭു, ജയ സുധ, സംഗീത, സംയുക്ത, ഷാം എന്നിവരും ചിത്രത്തിൽ അണിനിരക്കുന്നുണ്ട്. തമൻ ആണ് ചിത്രത്തിന് വേണ്ടി സം​ഗീതം ഒരുക്കുന്നത്.