പ്രേക്ഷകർക്ക് സമ്മാനിക്കുന്ന ചിത്രങ്ങളിലെല്ലാം തന്റെ കയ്യൊപ്പ് പതിക്കുന്ന സംവിധായകനാണ് വെട്രിമാരൻ. അന്താരാഷ്ട്ര തലത്തിൽ തന്നെ ചർച്ച ചെയ്യപ്പെടുന്ന സിനിമകളാണ് വെട്രിമാരൻ ഒരുക്കാറുള്ളത്. ഇപ്പോളിതാ, വിജയ്ക്കായി അദ്ദേഹം ഒരു കഥയുടെ പണിപ്പുരയിലാണെന്ന റിപ്പോർട്ടുകളാണ് പുറത്ത് വരുന്നത്.
സൂര്യയെ കേന്ദ്ര കഥാപാത്രമാക്കി വെട്രിമാരൻ ഒരുക്കുന്ന വാടിവാസൽ എന്ന ചിത്രത്തിന് ശേഷം കഥയുമായി വിജയ്‍യെ കാണുമെന്നാണ് വിവരം. ഒരു ദേശീയ മാധ്യമമാണ് ഇക്കാര്യം റിപ്പോർട്ട് ചെയ്തത്. നേരത്തെ താരത്തോട് വെട്രിമാരൻ ഒരു കഥ പറഞ്ഞിരുന്നു. എന്നാൽ, ആ ചിത്രം നടന്നില്ല. വെട്രിമാരൻ സംവിധാനം ചെയ്യുന്ന ചിത്രത്തിൽ അഭിനയിക്കാൻ താൻ കാത്തിരിക്കുന്നതായി വിജയ്‍യും പറഞ്ഞിരുന്നു.
വിടുതലൈ എന്ന ചിത്രമാണ് വെട്രിമാരന്റേതായി അണിയറയിൽ ഒരുങ്ങുന്നത്. സൂരിയും വിജയ് സേതുപതിയുമാണ് സിനിമയിൽ കേന്ദ്ര കഥാപാത്രങ്ങളായെത്തുന്നത്. വെട്രിമാരന്റെ മുൻ സിനിമകള്‍ക്ക് സ്ഥിരമായി ക്യാമറ കൈകാര്യം ചെയ്ത വെല്‍രാജ് ആണ് ഈ ചിത്രത്തിന്റെയും ഛായാഗ്രഹണം നിർവ്വഹിക്കുന്നത്.
വംശി പൈടിപ്പള്ളി സംവിധാനം ചെയ്യുന്ന ദളപതി 66 എന്ന ചിത്രം ആണ് വിജയ്‍യുടേതായി ഒരുങ്ങുന്നത്. രശ്മിക മന്ദാനയാണ് ചിത്രത്തിൽ നായികയായെത്തുന്നത്.
Post Your Comments