നായകനായി സച്ചിയുടെ മകൻ: അറ്റ് ടീസറെത്തി

മലയാള സിനിമയിലെ പ്രമുഖ എഡിറ്ററായ ഡോൺ മാക്‌സ് ഒരുക്കുന്ന ചിത്രമാണ് അറ്റ്. പത്ത് കൽപ്പനകൾ എന്ന സിനിമയ്ക്ക് ശേഷം ഡോൺ മാക്‌സ് സംവിധാനം ചെയ്യുന്ന ചിത്രമാണിത്. അന്തരിച്ച തിരക്കഥാകൃത്തും സംവിധായകനുമായ സച്ചിയുടെ മകൻ പുതുമുഖം ആകാശ് സെൻ ആണ് ചിത്രത്തിൽ നായകനായെത്തുന്നത്. ഒരു ഹൈ ടെക്ക് ത്രില്ലറായിട്ടാണ് ചിത്രം ഒരുങ്ങുന്നത്.

ഇന്റർനെറ്റ് ലോകത്തെ ചതികുഴികളും ഡാർക്ക് വെബ് കേന്ദ്രീകരിച്ചുള്ള ക്രിമിനൽ നെറ്റ് വർക്കുകളുമായി ബന്ധപ്പെട്ട വിഷയങ്ങളുമാണ് സിനിമയുടെ ഇതിവൃത്തം. മലയാളത്തിൽ ആദ്യമായാണ് ഡാർക്ക് വെബ് സംബന്ധമായ വിഷയങ്ങൾ ചർച്ച ചെയ്യുന്ന ഒരു മുഖ്യധാര സിനിമ പുറത്തിറങ്ങുന്നത്.

Also Read: തകർന്നടിഞ്ഞ് സാമ്രാട്ട് പൃഥ്വിരാജ്: നഷ്ടം നികത്താൻ അക്ഷയ് കുമാർ തയാറാകണമെന്ന് വിതരണക്കാർ

ഇപ്പോളിതാ, ചിത്രത്തിന്റെ ഔദ്യോഗിക ടീസർ പുറത്തിറക്കിയിരിക്കുകയാണ് അണിയറ പ്രവർത്തകർ. ഡ്രഗ്സ്, ക്രിപ്റ്റോ കറൻസി, സീക്രട്ട് കമ്മ്യൂണിറ്റി തുടങ്ങി നിരവധി ദുരൂഹമായ സംഭവങ്ങളുടെ കഥ പറഞ്ഞ് ത്രില്ലടിപ്പിക്കാൻ തന്നെയാണ് ചിത്രം എത്തുന്നതെന്നാണ് ടീസർ നൽകുന്ന സൂചന.

ഷാജു ശ്രീധർ, ശരൺ ജിത്ത്, ബിബിൻ പെരുമ്പള്ളി, സുജിത്ത് രാജ്, റേച്ചൽ ഡേവിഡ്, നയന എൽസ, സഞ്ജന ദോസ്, ആരാധ്യ ലക്ഷ്മൺ തുടങ്ങിയവരും ചിത്രത്തിൽ അണിനിരക്കുന്നുണ്ട്. കൊച്ചുറാണി പ്രൊഡക്ഷൻസ് ആണ് നിർമ്മാണം. രവിചന്ദ്രൻ ആണ് സിനിമയ്ക്ക് വേണ്ടി ക്യാമറ ചലിപ്പിക്കുന്നത്. ഇഷാൻ ദേവാണ് ചിത്രത്തിലെ ​ഗാനങ്ങൾക്ക് സം​ഗീതം പകരുന്നത്. ഷമീർ മുഹമ്മദാണ് എഡിറ്റ് ചെയ്യുന്നത്.