വിജയിച്ചത് നെല്ലിയിൽ ചന്ദ്രൻ തന്നെ: ‘പടച്ചോനേ ഇങ്ങള് കാത്തോളീ’ ക്യാരക്ടർ‌ പോസ്റ്റർ എത്തി

ശ്രീനാഥ് ഭാസിയെ കേന്ദ്ര കഥാപാത്രമാക്കി ബിജിത് ബാല ഒരുക്കുന്ന ചിത്രമാണ് ‘പടച്ചോനേ ഇങ്ങള് കാത്തോളീ’. ശ്രീനാഥ് ഭാസി ഇടതുപക്ഷ നേതാവായാണ് ചിത്രത്തിൽ അഭിനയിക്കുന്നത്. ആൻ ശീതളാണ് നായികയായെത്തുന്നത്. ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ജോസ് കുട്ടി മഠത്തിൽ, രഞ്ജിത് മണംബ്രക്കാട്ട് എന്നിവർ ചേർന്നാണ് ചിത്രം നിർമ്മിക്കുന്നത്. പ്രദീപ് കുമാർ കാവുംതറയാണ് തിരക്കഥ രചിച്ചിരിക്കുന്നത്.

ഇപ്പോളിതാ, ചിത്രത്തിന്റെ രണ്ടാം ക്യാരക്ടർ പോസ്റ്റർ പുറത്തിറങ്ങിയിരിക്കുകയാണ്. രഞ്ജിത് മണംബ്രക്കാട്ട് അവതരിപ്പിക്കുന്ന നെല്ലിയിൽ ചന്ദ്രൻ എന്ന കഥാപാത്രത്തിൻ്റെ പോസ്റ്ററാണ് റിലീസായത്. ‘എന്നെ ജയിപ്പിച്ച എല്ലാവർക്കും ഹൃദയത്തിൻ്റെ ഭാഷയിൽ നന്ദി’ എന്ന കുറിപ്പോടെ പുറത്തിറങ്ങിയ പോസ്റ്ററിൽ, വെള്ള വസ്ത്രം ധരിച്ച സ്ഥാനാർത്ഥിയുടെ വേഷത്തിലാണ് നെല്ലിയിൽ ചന്ദ്രൻ പ്രത്യക്ഷപ്പെടുന്നത്.

ഗ്രാമീണ പശ്ചാത്തലത്തിൽ നർമ്മത്തിനും പ്രണയത്തിനും സംഗീതത്തിനും പ്രാധാന്യം നൽകിയാണ് സിനിമ ഒരുങ്ങുന്നത്. ഗ്രേസ് ആൻ്റണി, രസ്ന പവിത്രൻ, അലെൻസിയർ, ജോണി ആൻ്റണി, മാമുക്കോയ തുടങ്ങിയരും ചിത്രത്തിൽ അണിനിരക്കുന്നുണ്ട്. അതിഥി വേഷത്തിൽ സണ്ണി വെയ്നും ചിത്രത്തിൽ എത്തുന്നുണ്ട്.

‘വെള്ളം’,’അപ്പൻ’ എന്നീ ചിത്രങ്ങൾക്ക് ശേഷം‌ ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ജോസ്കുട്ടി മഠത്തിൽ, രഞ്ജിത്ത് മണംബ്രക്കാട്ട്‌ എന്നിവർ ചേർന്ന് നിർമ്മിക്കുന്ന നാലാമത്തെ ചിത്രമാണിത്. ഷാൻ റഹ്മാനാണ് ചിത്രത്തിന് സംഗീതം നൽകുന്നത്.