ധ്യാൻ ശ്രീനിവാസൻ, ഗോകുൽ സുരേഷ് എന്നിവരെ കേന്ദ്ര കഥാപാത്രങ്ങളാക്കി അരുൺ ചന്ദു സംവിധാനം ചെയ്യുന്ന ചിത്രമാണ് സായാഹ്ന വാർത്തകൾ. അജു വർഗീസ്, ലെന എന്നിവർ പ്രധാന വേഷത്തിലെത്തിയ സാജൻ ബേക്കറി എന്ന ചിത്രത്തിന് ശേഷം അരുൺ ചന്ദു ഒരുക്കുന്ന ചിത്രമാണിത്. ധ്യാൻ ശ്രീനിവാസനും ഗോകുൽ സുരേഷും ആദ്യമായി ഒന്നിക്കുന്ന ചിത്രം എന്ന പ്രത്യേകത കൂടി സായാഹ്ന വാർത്തകൾക്കുണ്ട്. സമീപകാല രാഷ്ട്രീയ സാമൂഹിക പശ്ചാത്തലത്തിലാണ് ചിത്രം ഒരുങ്ങുന്നത്. ഇപ്പോളിതാ, ചിത്രത്തിന്റെ റിലീസ് തിയതി പ്രഖ്യാപിച്ചിരിക്കുകയാണ് അണിയറ പ്രവർത്തകർ. ചിത്രം ജൂൺ 24ന് തിയേറ്ററുകളിലെത്തും.
സച്ചിൻ ആർ ചന്ദ്രനും അരുൺ ചന്ദുവും ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. ഡി14 എന്റർടൈൻമെന്റ്സാണ് ചിത്രം നിർമ്മിക്കുന്നത്. അജു വർഗീസ്, ഇന്ദ്രൻസ്, പുതുമുഖം ശരണ്യ ശർമ്മ തുടങ്ങിയവർ സിനിമയിൽ പ്രധാന വേഷങ്ങളിലെത്തുന്നുണ്ട്. പ്രശാന്ത് പിള്ളയും ശങ്കർ ശർമ്മയും ചേർന്നാണ് ചിത്രത്തിന്റെ സംഗീതം ഒരുക്കുന്നത്. ശരത് ഷാജിയാണ് ഛായാഗ്രഹണം നിർവ്വഹിച്ചിരിക്കുന്നത്.
2019 ല്‍ ആണ് ചിത്രം പ്രഖ്യാപിച്ചത്. പിന്നീട്, ചിത്രത്തിന്റെ ടീസറും ട്രെയ്‌ലറുമെല്ലാം പുറത്ത് വന്നിരുന്നെങ്കിലും റിലീസുമായി ബന്ധപ്പെട്ട വിവരങ്ങളൊന്നും പുറത്ത് വന്നിരുന്നില്ല.
Post Your Comments