ഡൽഹി: രൺവീർ സിംഗ് നായകനായ ‘ജയേഷ്ഭായ് ജോർദാർ’ എന്ന ചിത്രത്തിനെതിരെ ഹൈക്കോടതി. ഭ്രൂണത്തിന്റെ ലിംഗനിർണയം എന്ന നിയമ വിരുദ്ധമായ സമ്പ്രദായത്തെ നിസാരവത്കരിക്കരുതെന്ന്, ചിത്രത്തിന്റെ നിർമ്മാതാക്കളോട് ഡൽഹി ഹൈക്കോടതി ആവശ്യപ്പെട്ടു. അത്തരം ആചാരങ്ങൾ ഒരു പതിവ് രീതിയായി കാണിക്കാൻ കഴിയില്ലെന്നും കോടതി വ്യക്തമാക്കി.
സിനിമയിൽ നിന്ന് ഇത്തരം രംഗം നീക്കം ചെയ്യണമെന്ന് ആവശ്യപ്പെട്ടുള്ള ഹർജി പരിഗണിച്ച കോടതി, പ്രസക്ത ഭാഗങ്ങൾ കാണിക്കാൻ നിർമ്മാതാക്കളായ യാഷ് രാജ് ഫിലിംസിനോട് ആവശ്യപ്പെട്ടു. ഇത് കാണുന്നതുവരെ ചിത്രത്തിന് അനുമതി നൽകില്ലെന്നും ലിംഗനിർണയം നിയമവിരുദ്ധമാണെന്ന വസ്തുത ചിത്രത്തിന്റെ ട്രെയിലർ ഉയർത്തിക്കാട്ടുന്നില്ലെന്നും കോടതി വ്യക്തമാക്കി.
സിനിമയിൽ ഭ്രൂണത്തിന്റെ ലിംഗനിർണയം കാണിക്കരുതെന്ന ഹർജിക്കാരന്റെ വാദത്തോട് പ്രതികരിച്ച കോടതി, ഒരു രംഗം അതിന്റെ പശ്ചാത്തലത്തിൽ കാണേണ്ടതുണ്ടെന്നും പറഞ്ഞു.
‘സിനിമ സമൂഹത്തിന്റെ മോശം വശങ്ങൾ കാണിക്കുന്നുണ്ടോ? കൊലപാതകമോ ബലാത്സംഗമോ ഒരു കുറ്റകൃത്യമായതിനാൽ കാണിക്കരുത്, എന്ന് പറയുന്നത് പോലെയാണ് ഇത്. അത് സന്ദർഭമാണ്. നിയമ വിരുദ്ധമാണെന്ന് സന്ദർഭത്തിൽ കാണിച്ചാൽ എങ്ങനെ പറയും? അല്ലാത്തപക്ഷം നിങ്ങൾ എങ്ങനെ ഒരു കഥ പറയും?’, കോടതി ചോദിച്ചു. ചിത്രത്തിൽ ശാലിനി പാണ്ഡെയാണ് നായികയായി അഭിനയിക്കുന്നത്. ബൊമൻ ഇറാനി, രത്‌ന പഥക് ഷാ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.
Post Your Comments