അക്ഷയ് കുമാറിനെ നായകനാക്കി അഭിഷേക് ശർമ്മ ഒരുക്കുന്ന ചിത്രമാണ് ‘രാംസേതു’. അക്ഷയ് കുമാറിനൊപ്പം ജാക്വലിൻ ഫെർനാണ്ടസും നുസ്റത് ബറൂച്ചയും ചിത്രത്തിൽ പ്രധാന വേഷങ്ങളിലെത്തുന്നുണ്ട്. ഇപ്പോളിതാ, ചിത്രം ഈ വർഷം ദീപാവലിക്ക് തിയേറ്ററിൽ എത്തുമെന്ന വാർത്തയാണ് അണിയറ പ്രവർത്തകർ പുറത്ത് വിട്ടിരിക്കുന്നത്. അക്ഷയ് കുമാർ തന്റെ ഇൻസ്റ്റഗ്രാം ഹാൻഡിലിലൂടെയാണ് ഇക്കാര്യം അറിയിച്ചത്. കൂടാതെ, ചിത്രത്തിൻ്റെ ഫസ്റ്റ് ലുക്ക് ഇമേജും താരം പങ്കുവച്ചിട്ടുണ്ട്.
ലൈക്ക പ്രൊഡക്ഷൻസ്, കേപ് ഓഫ് ഗുഡ് ഫിലിംസ്, അബുണ്ടാന്റിയ എൻ്റർടൈന്മെൻ്റ് എന്നിവർക്കൊപ്പം ആമസോൺ പ്രൈം വീഡിയോയും ചിത്രത്തിൻ്റെ നിർമ്മാതാവാണ്. ആദ്യമായാണ് പ്രൈം വീഡിയോ സിനിമാ നിർമ്മാണ മേഖലയിലേക്ക് കടക്കുന്നത്. ‘പരമാണു’, ‘തേരേ ബിൻ ലാദൻ’ എന്നീ സിനിമകളിലൂടെ ശ്രദ്ധേയനായ സംവിധായകനാണ് ചിത്രം ഒരുക്കുന്ന അഭിഷേക് ശർമ്മ.
നായകൻ അക്ഷയ് കുമാർ അടക്കം 45 അണിയറ പ്രവർത്തകർക്ക് കൊവിഡ് ബാധ സ്ഥിരീകരിച്ചതിനു പിന്നാലെ സിനിമാ ചിത്രീകരണം നിർത്തിയിരുന്നു. മുംബൈയിലെ പുതിയ ലൊക്കേഷനിൽ ചിത്രീകരണം ആരംഭിക്കുന്നതിന് മുന്നോടി ആയി നടത്തിയ കൊവിഡ് ടെസ്റ്റിലാണ് അണിയറ പ്രവർത്തകർക്ക് വൈറസ് ബാധ സ്ഥിരീകരിച്ചത്.
Post Your Comments