ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ‘ജുറാസിക് വേൾഡ്’ സീരീസിലെ മൂന്നാം ഭാഗമായ ‘ജുറാസിക് വേൾഡ്; ഡൊമിനിയൻ’. കോളിൻ ട്രെവോറോ സംവിധാനം ചെയ്യുന്ന ചിത്രം ആമ്പ്‌ലിൻ എന്റർടെയ്ൻമെന്റ്, യൂണിവേള്‌സൽ പിക്‌ചേഴ്‌സ്, പെർഫെക്ട് വേൾഡ് പിക്‌ചേഴ്‌സ്, ലാറ്റിന പിക്‌ചേഴ്‌സ് എന്നീ പ്രൊഡക്ഷൻ കമ്പനികൾ ചേർന്നാണ് നിർമ്മിക്കുന്നത്. കോളിൻ ട്രോവോറോ, മൈക്കിൾ ക്രിക്ടൺ, ജെറെക് കോനോലി എന്നിവർ ചേർന്നാണ് തിരക്കഥയെഴുതിയിരിക്കുന്നത്.
ഇപ്പോളിതാ, ചിത്രത്തിന്റെ പുതിയ ട്രെയ്ലർ പുറത്ത് വിട്ടിരിക്കുകയാണ് അണിയറ പ്രവർത്തകർ. നേരത്തെ പുറത്തുവിട്ടിരുന്ന ചിത്രത്തിന്റെ മറ്റൊരു ട്രെയ്‌ലറിന് വൻ സ്വീകാര്യത ലഭിച്ചിരുന്നു. പുതിയ ട്രെയ്ലറിൽ ഒരു ചെറിയ ദിനോസറിനെ വേട്ടയാടുന്നതും പിന്നീട് ദിനോസറുകൾ കീഴടക്കുന്ന നഗരങ്ങളുടെ കാഴ്ചകളുമാണുള്ളത്. ദിനോസറുകൾ ജനങ്ങൾക്കിടയിൽ എത്തുന്നതും അവിടെ സൃഷ്ടിക്കുന്ന ഭീതിയുമാണ് ചിത്രത്തിന്റെ പ്ലോട്ടെന്നാണ് ട്രെയ്‌ലറിലൂടെ ലഭിക്കുന്ന സൂചന. കഴിഞ്ഞ ഭാഗമായ ‘ഫോളൻ കിംഡ’ത്തിന് പിന്നാലെ നടക്കുന്ന സംഭവങ്ങളാണെന്നും അഭ്യൂഹങ്ങളുണ്ട്.
ക്രിസ് പാറ്റ്, ബ്രൈസ് ഡല്ലാസ്, ലൗറ ഡേൺ, സാം നെയിൽ, ലോറ ഡേൺ, ജോഫ് ഗോഡ്ബ്ലം, ഇസബെല്ലാ സെർമോൺ, ജസ്റ്റിസ് സ്മിത്ത്, സ്‌കോട്ട് ഹേസ് എന്നിവരാണ് ചിത്രത്തിൽ പ്രധാന കഥാപാത്രങ്ങളായെത്തുന്നത്. സിനിമ ജൂൺ 10ന് തിയേറ്ററുകളിൽ എത്തും.
Post Your Comments