ആരാധകര്‍ കാത്തിരിക്കുന്ന മമ്മൂട്ടി ചിത്രമാണ് ‘സിബിഐ 5 ദ ബ്രെയിന്‍’. മലയാളത്തിലെ എക്കാലത്തെയും കുറ്റാന്വേഷണ സിനിമകളിൽ മികച്ച് നിൽക്കുന്ന ‘സിബിഐ’ സീരീസിൽ ഒരുങ്ങുന്ന അഞ്ചാമത്തെ ചിത്രമാണിത്. എസ്.എൻ സ്വാമിയുടെ കഥയിൽ കെ. മധു തന്നെയാണ് അഞ്ചാം തവണയും മമ്മൂട്ടിയുടെ സേതുരാമയ്യരെ വെള്ളിത്തിരയിൽ എത്തിക്കുന്നത്. സ്വര്‍ഗ്ഗചിത്രയുടെ ബാനറില്‍ അപ്പച്ചനാണ് നിര്‍മാണം. സിനിമ മെയ് ഒന്നിന് തിയേറ്ററുകളിലെത്തും. ഇപ്പോളിതാ, ചിത്രത്തിന്റെ റിലീസിന് മുന്നോടിയായി ബുർജ് ഖലീഫയിൽ പ്രൊമോ ട്രെയ്ലർ പ്രദർശിപ്പിക്കുമെന്ന് അറിയിച്ചിരിക്കുകയാണ് മമ്മൂട്ടി. സമൂഹമാധ്യങ്ങളിലൂടെയാണ് അദ്ദേഹം ഈ വാർത്ത പുറത്ത് വിട്ടത്. ഏപ്രിൽ 29ന് രാത്രി 8.30, 9.00 സമയങ്ങളിലാണ് ട്രെയ്ലർ ബുർജ് ഖലീഫയിൽ തെളിയുന്നത്. നേരത്തെ, ദുൽഖർ സൽമാൻ നായകനായ ‘കുറുപ്പി’ന്റെ പ്രൊമോ ബുർജ് ഖലീഫയിൽ തെളിഞ്ഞത് ശ്രദ്ധേയമായിരുന്നു.
1988-ല്‍ പുറത്തിറങ്ങിയ ‘ഒരു സിബിഐ ഡയറികുറിപ്പ് ‘ എന്ന ചിത്രത്തിലൂടെയാണ് ‘സിബിഐ ‘ സീരിസിന് തുടക്കമായത്. തുടര്‍ന്ന്, ‘ജാഗ്രത ‘, ‘സേതുരാമയ്യര്‍ സിബിഐ ‘, ‘നേരറിയാന്‍ സിബിഐ ‘ തുടങ്ങിയ സിനിമകളും പുറത്തിറങ്ങി. സേതുരാമയ്യര്‍ എന്ന സിബിഐ ഉദ്യോഗസ്ഥനും അദ്ദേഹം അന്വേഷിക്കുന്ന കേസുകളുമാണ് സിനിമകളുടെ ഇതിവൃത്തം. ജഗതി ശ്രീകുമാർ ഏറെ കാലത്തിന് ശേഷം അഭിനയരംഗത്തേക്ക് തിരിച്ചെത്തുന്ന ചിത്രമെന്ന പ്രത്യേകതയും ‘സിബിഐ 5 ‘ നുണ്ട്.
ചിത്രത്തിൽ വിക്രമായി ജഗതി വീണ്ടുമെത്തുമ്പോൾ, ചാക്കോയായി എത്തുന്നത് മുകേഷ് തന്നെയാണ്. രഞ്ജി പണിക്കര്‍, അനൂപ് മേനോന്‍, സായി കുമാര്‍, സൗബിന്‍ ഷാഹിര്‍, ദിലീഷ് പോത്തന്‍, പ്രശാന്ത് അലക്‌സാണ്ടര്‍, രമേശ് പിഷാരടി, ജയകൃഷ്ണന്‍, സുദേവ് നായര്‍, അസീസ് നെടുമങ്ങാട്, സന്തോഷ് കീഴാറ്റൂര്‍, ഇടവേള ബാബു, കോട്ടയം രമേശ്, മുകേഷ്, സുരേഷ് കുമാര്‍, തന്തൂര്‍ കൃഷ്ണന്‍, ആശാ ശരത്ത്, അന്നാ രേഷ്മ രാജന്‍, അന്‍സിബ ഹസന്‍, മാളവിക മേനോന്‍, മാളവിക നായര്‍, സ്വാസിക തുടങ്ങി വലിയ താര നിര തന്നെ ചിത്രത്തിൽ അണിനിരക്കുന്നുണ്ട്.
Post Your Comments