ദുൽഖർ സൽമാൻ, മൃണാൽ ഠാക്കൂർ, രശ്മിക മന്ദാന എന്നിവർ പ്രധാന കഥാപാത്രങ്ങളായി എത്തുന്ന പുതിയ ചിത്രമാണ് ‘സീതാരാമം’. ചിത്രത്തിന്റെ സംവിധായകൻ ഹനു രാഘവപുടിയുടെ ജന്മദിനമാണ് ഇന്ന് . തങ്ങളുടെ പ്രിയപ്പെട്ട സംവിധായകന് മനോഹരമായൊരു പിറന്നാൾ സമ്മാനം തന്നെയാണ് ‘സീതാരാമം’ ടീം ഒരുക്കിയത്. ‘ഞങ്ങളുടെ മാഡ് മാന് ജന്മദിനാശംസകൾ’ എന്ന തലക്കെട്ടുമായി പുതിയ വീഡിയോ റിലീസ് ചെയ്തിരിക്കുകയാണ് വൈജയന്തി നെറ്റ്‌വർക്ക്.
39 സെക്കൻഡ് ദൈർഘ്യമുള്ള വീഡിയോയിൽ സിനിമാ സെറ്റുകളിൽ നിന്നുള്ള മനോഹരമായ ദൃശ്യങ്ങളാണ് ഉൾപ്പെടുത്തിയത്. മഞ്ഞുമൂടിയ മലനിരകൾ മുതൽ വീടിനുള്ളിൽ വരെ, ഹനു രാഘവപുടിയുടെ പ്രവർത്തനം കാണിക്കുന്ന രസകരമായ ദൃശ്യങ്ങളാണ് വീഡിയോയിലുള്ളത്. ഒരു വിചിത്ര മനുഷ്യനെയും അയാളുടെ അഭിനിവേശവും നിങ്ങൾക്ക് ഉടൻ കാണാം എന്നും വീഡിയോയിൽ കുറിച്ചിട്ടുണ്ട്.
ചിത്രത്തിൽ സീതയായി മൃണാൽ എത്തുമ്പോൾ രാമനായെത്തുന്നത് ദുൽഖർ സൽമാനാണ്. അഫ്രീൻ എന്ന കഥാപാത്രത്തെയാണ് രശ്മിക അവതരിപ്പിക്കുന്നത്. ഒരു തീവ്ര പ്രണയകഥയാണ് ചിത്രമെന്ന് അണിയറപ്രവർത്തകർ നേരത്തെ വ്യക്തമാക്കിയിരുന്നു. ‘പ്രൊഡക്ഷൻ നമ്പർ 7’ എന്നായിരുന്നു ആദ്യം ചിത്രത്തിന് പേരിട്ടിരുന്നത്. അശ്വിൻ ദത്ത് ആണ് നിർമ്മാണം. ചിത്രം ഉടൻ പ്രേക്ഷകരിലേക്ക് എത്തുമെന്നാണ് സൂചന. റിലീസ് തീയതി പ്രഖ്യാപിച്ചിട്ടില്ല.
Post Your Comments