കൊച്ചി: കടം വീട്ടാനും കുടുംബം പുലര്‍ത്താനും ലോട്ടറി വില്‍ക്കുന്ന 74കാരിയായ വയോധികയുടെ പണയത്തിലിരുന്ന വീടിന്റെ ആധാരം എടുത്ത് നൽകി എം.പിയും നടനുമായ സുരേഷ് ഗോപി. വയനാട്ടിലെ ആദിവാസി വിഭാഗത്തിന് സുരേഷ് ഗോപി ചെയ്തു നൽകിയ സഹായങ്ങളുടെ വാർത്ത പുറത്തുവന്നിട്ട് മണിക്കൂറുകൾ ആയില്ല. ഇതിനു പിന്നാലെയാണ് പുതിയ സംഭവം. പണയത്തിലായിരുന്ന ആധാരം ഇന്നലെ വൈകിട്ട് 4 മണിക്ക് സുരേഷ് ഗോപി തിരിച്ചെടുത്ത് വയോധികയ്ക്ക് നൽകി. സുരേഷ് ഗോപിയുടെ മകനും നടനുമായ ഗോകുൽ സുരേഷ് ആണ് ആധാരം നേരിട്ട് വയോധികയ്ക്ക് കൈമാറിയത്.
വ്ലോഗർ സുശാന്ത് നിലമ്പൂർ ആണ് ഇക്കാര്യം അറിയിച്ചത്. സുശാന്തിന്റെ വീഡിയോ കണ്ട് വിഷയത്തിൽ ഇടപെട്ട താരം, ആധാരം എടുത്ത് നൽകാമെന്ന് നേരത്തെ വയോധികയെ അറിയിക്കുകയായിരുന്നു. പിന്നാലെയാണ്, നടപടി. എറണാകുളം സ്വദേശിയായ പുഷ്പ എന്ന 74കാരി റോഡരികില്‍ ലോട്ടറി വില്‍ക്കുന്ന വീഡിയോ സുശാന്ത് കഴിഞ്ഞ ദിവസമാണ് പോസ്റ്റ് ചെയ്തത്. വീഡിയോ വൈറലായിരുന്നു. കടം വീട്ടാനും കുടുംബം പുലർത്താനും വേണ്ടിയാണ് താൻ, ഈ പ്രായത്തിലും പണിക്കിറങ്ങിയതെന്ന് ഇവർ വീഡിയോയിൽ പറഞ്ഞിരുന്നു. വിധവയായ മരുമകളും മക്കളും ആണ് ഇവർക്കുള്ളത്. മൂത്തമകൻ ഹൃദ്രോഗിയാണ്. ഇളയമകൻ മരണപ്പെട്ടതും ഹൃദ്രോഗത്തെ തുടർന്നായിരുന്നു.
ലോട്ടറിയെടുക്കാനെത്തുന്നവരിൽ ചിലർ, തന്നെ പറ്റിക്കാറുണ്ടെന്ന് ഇവർ തുറന്നു പറഞ്ഞിരുന്നു. 300 മുതൽ 1000 വരെ ആളുകൾ തന്നെ പറ്റിച്ച് സ്വന്തമാക്കാറുണ്ടെന്ന് ഇവർ പറഞ്ഞു. വീടിന്റെ ആധാരം ബാങ്കിലാണെന്നും അത് തിരിച്ചെടുക്കാന്‍ 65,000 രൂപ വേണമെന്നുമായിരുന്നു ഇവർ അറിയിച്ചത്. ഈ തുകയാണ് ഇപ്പോൾ സുരേഷ് ഗോപി നൽകി, ആധാരം തിരിച്ചെടുത്തിരിക്കുന്നത്.
Post Your Comments