ഹിന്ദി വെബ്‌സീരിസില്‍ അഭിനയിക്കാനൊരുങ്ങി ദുല്‍ഖര്‍ സല്‍മാന്‍. ഡേറ്റ് പ്രശ്‌നങ്ങള്‍ കാരണം പിന്മാറിയ ദില്‍ജിത്ത് ദോഷാന്‍ജിന് പകരക്കാരനായി ജെന്റില്‍മാന്‍, ഗോ ഗോവ ഗോണ്‍, ദി ഫാമിലി മാന്‍ എന്നിവയിലൂടെ ശ്രദ്ധേയരായ ഇരട്ടസംവിധായകരായ രാജ് – ഡി കെ ഒരുക്കുന്ന സീരിസിലാണ് ദുല്‍ഖര്‍ അഭിനയിക്കുന്നത്.
മൂന്ന് കഥാപാത്രങ്ങളെ ചുറ്റിപറ്റിയായിരിക്കും സീരിസ് നിര്‍മ്മിക്കുക. രാജ്കുമാര്‍ റാവോ, ആദര്‍ശ് ഗൗരവ് എന്നിവരാണ് ദുല്‍ഖറിനൊപ്പം സീരിസില് മറ്റ് കഥാപാത്രങ്ങളെ അവതരിപ്പിക്കുക. വെബ്സീരിസിനെ പറ്റി വിശദ വിവരങ്ങള്‍ പുറത്ത് വിട്ടിട്ടില്ല.
ചിത്രീകരണം ആരംഭിച്ചെങ്കിലും നിലവില്‍ കൊവിഡ് പോസിറ്റീവായി ക്വാറന്റീനിലിരിക്കുന്ന ദുല്‍ഖര്‍ ഇതുവരെ ജോയിന്‍ ചെയ്തിട്ടില്ല. ദുല്‍ഖര്‍ കൊവിഡ് ഭേദമായതിന് ശേഷം ഷൂട്ടിംഗിനെത്തും. നെറ്റ്ഫ്ളിക്സില്‍ റിലീസ് ചെയ്യുന്ന സീരിസ് ഈ വര്‍ഷാവസാനം പുറത്തിറങ്ങുമെന്നാണ് പ്രതീക്ഷിക്കുന്നത്. നേരത്തെ പുറത്തിറങ്ങിയ കാരവാന്‍, സോയ ഫാക്ടര്‍ ഇനി പുറത്തിറങ്ങാനിരിക്കുന്ന ചുപ്പ് എന്നിവയ്ക്ക് ശേഷമുള്ള ദുല്‍ഖറിന്റെ നാലാമത്തെ ഹിന്ദി പ്രൊജക്ട് ആണിത്.
കഴിഞ്ഞ ദിവസമാണ് ദുല്‍ഖറിന് കൊവിഡ് സ്ഥിരീകരിച്ചിരുന്നത്. ദുല്‍ഖര്‍ തന്നെയാണ് ഈ കാര്യം അറിയിച്ചത്. നേരിയ പനിയുള്ളതൊഴിച്ചാല്‍ മറ്റു ആരോഗ്യ പ്രശ്‌നങ്ങളൊന്നുമില്ലെന്ന് ദുല്‍ഖര്‍ അറിയിച്ചു.
Post Your Comments