ആർ ആർ ആർ പ്രീ ലോഞ്ച് ഇവന്റ് : എസ് എസ് രാജമൗലിയും താരങ്ങളും തലസ്ഥാന നഗരിയിൽ

തിരുവനന്തപുരം : ലോകസിനിമയിൽ റെക്കോർഡുകൾ ഭേദിച്ച ബാഹുബലിക്ക് ശേഷം രാജമൗലി ഒരുക്കുന്ന ആർ ആർ ആർ സിനിമയുടെ പ്രീ ലോഞ്ച് ഇവന്റിൽ സംവിധായകൻ എസ് എസ് രാജമൗലിയും അഭിനേതാക്കളായ റാം ചരൺ, ജൂനിയർ എൻ ടി ആർ, ആലിയ ഭട്ട് എന്നിവരും പങ്കെടുക്കുന്നു. തിരുവനന്തപുരം കവടിയാർ ഉദയ് പാലസ് കൺവെൻഷൻ സെന്ററിൽ ഡിസംബർ 26 ന് വൈകിട്ട് 6 മണിക്കാണ് ചിത്രത്തിന്റെ പ്രീ ലോഞ്ച് ഇവന്റ് നടക്കുന്നത് .

ബാഹുബലിയെ വെല്ലുന്ന ആർ ആർ ആർ ട്രൈലെർ റിലീസ് ആയ ശേഷം സിനിമയുടെ റിലീസിനായി കാത്തിരിക്കുകയാണ് ഓരോ പ്രേക്ഷകരും. 2022 ജനുവരി 7നാണ് ചിത്രം റീലിസ് ചെയ്യുന്നത്. റീലിസിനു മുമ്പ് തന്നെ ഈ ചിത്രം കോടികളുടെ ബിസിനസ് സ്വന്തമാക്കിയത് നേരത്തെ വാർത്തയായിരുന്നു.

കഴിഞ്ഞ 20 വർഷമായി സിനിമാ രംഗത്ത് വ്യക്തി മുദ്ര പതിപ്പിച്ച ഷിബു തമീന്‍സിന്റെ നേതൃത്വത്തില്‍ റിയാ ഷിബുവിന്റെ എച്ച്ആര്‍ പിക്‌ചേര്‍സ് ആണ് ആർ ആർ ആർ കേരളത്തിൽ വിതരണം നടത്തുന്നത്. ഡിസ്ട്രിബൂഷൻ രംഗത്ത് 109 ചിത്രങ്ങൾ തികച്ചതിനു പുറമെ എസ് എസ് രാജമൗലിയുടെ ആർ ആർ ആർ മലയാളത്തിൽ എത്തിക്കാൻ സാധിച്ചത് ഏറ്റവും വലിയ അനുഗ്രഹമായി കണക്കാക്കുന്നുവെന്ന് ഷിബു തമീൻസ് പറഞ്ഞു.

1920കളിലെ അല്ലൂരി സീതാരാമ രാജു, കോമരം ഭീം എന്നീ സ്വാതന്ത്ര്യസമര സേനാനികളുടെ ചരിത്ര കഥയാണ് ആർ ആർ ആർ പറയുന്നത്. അജയ് ദേവ്ഗൺ, ബ്രിട്ടീഷ് നടി ഡെയ്‌സി എഡ്‌ജർ, തമിഴ് നടന്‍ സമുദ്രക്കനി, ശ്രീയ ശരണ്‍ എന്നിവരാണ് മറ്റ് അഭിനേതാക്കള്‍.

ഇന്ത്യയിലെ പ്രേക്ഷക പ്രീതിയും കളക്ഷൻ റെക്കോർഡും നേടിയ ബ്രഹ്മാണ്ഡ ചിത്രമായ ബാഹുബലിയുടെ പിന്നില്‍ പ്രവര്‍ത്തിച്ചവരാണ് ആർ ആർ ആറിനു പിന്നിലും എത്തുന്നത്. കെ കെ സന്തില്‍ കുമാര്‍ ഛായാഗ്രഹണവും സാബു സിറിള്‍ പ്രൊഡക്ഷന്‍ ഡിസൈനിംഗും നിർവ്വഹിക്കുന്നു. രാജമൗലിയുടെ പിതാവ് വി വിജയേന്ദ്ര പ്രസാദാണ് കഥയൊരുക്കുന്നത്. കീരവാണി സംഗീതം നൽകുന്ന ചിത്രത്തിൽ വിഷ്വൽ എഫക്ട് വി ശ്രീനിവാസ് മോഹനാണ്. വസ്ത്രാലങ്കാരം നിർവ്വഹിച്ചിരിക്കുന്നത് രാമ രാജമൗലിയാണ്. പി ആർ ഓ : പ്രതീഷ് ശേഖർ.