‘ഇതിനുള്ള ഉത്തരം നിനക്ക് തരണോ അതോ നിന്റെ ഭാര്യക്ക് കൊടുക്കണോ എന്ന് ചോദിച്ചതോടെ അയാൾ വിഷയം മാറ്റി’: തുറന്ന് പറഞ്ഞ് ഗൗരി

പൗര്‍ണമിതിങ്കള്‍ എന്ന പരമ്പരയിലൂടെ ശ്രദ്ധ നേടിയ നടിയാണ് ഗൗരി. നടന്‍ ആനന്ദ് നാരായണന്റെ യൂട്യൂബ് ചാനലിലൂടെ തന്റെ വിശേഷങ്ങളും ദുരനുഭവങ്ങളും പങ്കുവച്ച ഗൗരി മുൻപ് സഹപ്രവര്‍ത്തകനില്‍ നിന്നുമുണ്ടായ മോശം അനുഭവത്തെ കുറിച്ച് വെളിപ്പെടുത്തുകയാണ് ഇപ്പോൾ.

ഗൗരിയുടെ വാക്കുകൾ :

‘പതിനെട്ടോ പത്തൊമ്പതോ വയസുള്ളപ്പോഴാണ് ‘അനുജത്തി’ എന്ന സീരിയല്‍ ചെയ്യുന്നത്. അന്ന് അമ്മ തന്റെ ഒപ്പം ഉണ്ടായിട്ടും ഒരു അനുഭവം നേരിട്ടു. പക്ഷേ പേരൊന്നും പറയുന്നില്ല. ആദ്യം സെറ്റില്‍ ഒരു വിഷയം ഉണ്ടായി.

അന്നൊക്കെ താന്‍ കുഞ്ഞ് സൈസ് ആയിരുന്നു. അതു കൊണ്ടു തന്നെ കുഞ്ഞുകുട്ടി ആണല്ലോ പരുവപ്പെടുത്തി എടുക്കാം എന്നായിരിക്കാം പലരുടെയും വിശ്വാസം. അങ്ങനെ സെറ്റില്‍ നിന്നും എപ്പോഴും ഒരാള്‍ തന്നെ സൈറ്റൊക്കെ അടിച്ചു കാണിക്കും. കുറെ കഴിഞ്ഞപ്പോള്‍ ഞാൻ റിയാക്റ്റ് ചെയ്തു. അങ്ങനെ സെറ്റില്‍ വിഷയമായി.

ആ സമയത്താണ് ഒരാള്‍ തന്റെ ഭാഗത്തു നിന്നും സംസാരിക്കുകയും ഹീറോ ആയി ഇടപെടുകയും മറ്റും ചെയ്തത്. അത് കഴിഞ്ഞു കുറച്ചു ദിവസം കഴിഞ്ഞപ്പോഴക്കും രാത്രിയില്‍ തനിക്ക് ഒരു മെസേജ് വന്നു. കഴിച്ചോ കുടിച്ചോ എന്നൊക്കെ ചോദ്യങ്ങളായി.

പിന്നീട് വന്ന ചോദ്യം അമ്മ ഉറങ്ങിയോ എന്നായി. പുറത്തേക്ക് വരാമോ, ഒരു ഉമ്മ തരാമോ എന്നാണ് പിന്നീട് വന്നത്. കുറേനേരം താന്‍ സൈലന്റ് ആയി പോയി. പിന്നീട് താന്‍ ചോദിച്ചു ‘ഇതിനുള്ള ഉത്തരം നിനക്ക് തരണോ അതോ നിന്റെ ഭാര്യക്ക് കൊടുക്കണോ’ എന്ന്. അയാളുടെ ഭാര്യയെ ഒക്കെ എനിക്ക് അറിയുന്നതാണ്. അതോടെ അയാള്‍ വിഷയം മാറ്റി. ‘പേടിച്ചു പോയോ തമാശ പറഞ്ഞതാണ്’ എന്നൊക്കെ ആക്കി സംസാരം. പിറ്റേ ദിവസം ഞാൻ എല്ലാവരോടും ഇക്കാര്യം പറഞ്ഞു’.