ബുര്‍ജ് ഖലീഫയില്‍ ട്രെയ്‌ലർ പ്രദര്‍ശിപ്പിക്കുന്ന ആദ്യ മലയാള ചിത്രം എന്ന റെക്കോര്‍ഡ് സ്വന്തമാക്കാൻ ‘കുറുപ്പ്’

കൊച്ചി : ബുര്‍ജ് ഖലീഫയില്‍ ട്രെയ്‌ലർ പ്രദര്‍ശിപ്പിക്കുന്ന ആദ്യ മലയാള ചിത്രം എന്ന റെക്കോര്‍ഡ് കൂടി സ്വന്തമാക്കാൻ ഒരുങ്ങുകയാണ് ദുല്‍ഖര്‍ സല്‍മാന്റെ ‘കുറുപ്പ്’. നവംബര്‍ 10 ന് രാത്രി 8 നും 8:30 നും ഇടയില്‍ ബുര്‍ജ് ഖലീഫയില്‍ ചിത്രത്തിന്റെ ട്രെയ്‌ലർ പ്രദര്‍ശിപ്പിക്കുമെന്ന് നായകനും നിര്‍മ്മാതാവുമായ ദുല്‍ഖര്‍ സൽമാൻ അറിയിച്ചു. ഈ മാസം 12 ന് ചിത്രം തിയറ്ററുകളില്‍ എത്താനിരിക്കെയാണ് 10ാം തിയതി ബുര്‍ജ് ഖലീഫയില്‍ ട്രെയ്‌ലർ പ്രദര്‍ശിപ്പിക്കുന്നത്.

‘ഇത്തരം ഒരു മഹത്തായ കാഴ്ച സാധ്യമാക്കിയതിന് ഫാര്‍സ് ഫിലിംകോ എല്‍എല്‍സിയുടെ അഹമ്മദ് ഗോല്‍ചിനും വേഫെറര്‍ ഫിലിംസ് & എംസ്റ്റാര്‍ എന്റര്‍ടെയ്ന്‍മെന്റ്സ് ഓവര്‍സീസ് ടീമിന്റെ തലവനായ ഷംനാദ് സിയാദിനും നന്ദി’- എന്ന് ദുല്‍ഖര്‍ ഫേസ്ബുക്കില്‍ കുറിച്ചു. കുറുപ്പ് ശ്രീനാഥ് രാജേന്ദ്രനാണ് സംവിധാനം ചെയ്തിരിക്കുന്നത്. ദുല്‍ഖറിന്റെ കരിയറിലെ തന്നെ ഏറ്റവും മുതല്‍ മുടക്കുള്ള ചിത്രം കൂടിയാണിത്. 35 കോടിയാണ് ചിത്രത്തിന്റെ നിർമ്മാണ ചെലവ്.