ബംഗളുരു: അന്തരിച്ച കന്നഡ സൂപ്പര്‍താരം പുനീത് രാജ് കുമാറിനെ അധിക്ഷേപിച്ച് സോഷ്യല്‍ മീഡിയയില്‍ പോസ്റ്റ് പങ്കുവെച്ച കൗമാരക്കാരന്‍ അറസ്റ്റില്‍. ബംഗുളുരു സൈബര്‍ ടീമാണ് ഇയാളെ അറസ്റ്റ് ചെയ്തത്.
പുനീതിന്റെ അപ്രതീക്ഷിത വിയോഗത്തില്‍ സംസ്ഥാനം മുഴുവന്‍ ദുഖം ആചരിക്കുന്ന ഈ സാഹചര്യത്തിൽ അസ്വാഭാവികമായ രീതിയില്‍ സോഷ്യല്‍ മീഡിയയിലൂടെ ചിത്രങ്ങള്‍ക്കൊപ്പം കമന്‍റിടുകയും പ്രചരിപ്പിക്കുകയും ചെയ്തതിനാണ് അറസ്റ്റ്.
സുഹൃത്തിനൊപ്പം ബിയര്‍ ബോട്ടില്‍ പിടിച്ചു നില്‍ക്കുന്ന ചിത്രങ്ങളും അതിനൊപ്പമുള്ള കമന്‍റുമാണ് ആരാധകരില്‍ രോഷം ഉണര്‍ത്തിയത്. സോഷ്യല്‍ മീഡിയയില്‍ നിമിഷ നേരങ്ങള്‍ക്കുള്ളില്‍ തന്നെ പോസ്റ്റ് വൈറലായി. ഒരു രാഷ്ട്രീയപ്രവര്‍ത്തകന്‍ ഈ പോസ്റ്റിന്റെ സ്‌ക്രീന്‍ഷോട്ട് ബെംഗളൂരു സിറ്റി പോലീസിനെ ടാഗ് ചെയ്ത് ട്വിറ്ററിലിട്ടിരുന്നു.
പുനീതിന്റെ നിര്യാണത്തെ തുടര്‍ന്ന് അനിഷ്ട സംഭവങ്ങള്‍ ഉണ്ടാകാതിരിക്കാന്‍ മുന്‍കരുതലായി മദ്യവില്‍പ്പന നിരോധിച്ചിരുന്നതിനു പിന്നാലെയാണ് ഈ സംഭവം. നിരവധി ആളുകളാണ് പോസ്റ്റിട്ടയാള്‍ക്കെതിരെ കേസെടുക്കണമെന്ന ആവശ്യമുന്നയിച്ചത്.
Post Your Comments