മുംബൈ : കെ11 എഡ്യുക്കേഷന്‍ പ്രൈവറ്റ് ലിമിറ്റഡിന്‍റെ ഡയരക്ടറായ ഫിറ്റ്നസ് ട്രെയിനര്‍ കൈസാദ് കപാഡിയ കോവിഡ് ബാധിച്ച്‌ മരിച്ചു. ബോളിവുഡ് താരം ടൈഗര്‍ ഷ്റോഫിന്‍റെ ഫിറ്റ്നസ് ട്രെയിനര്‍ ആയിരുന്നു അദ്ദേഹം. നിരവധി ബോളിവുഡ് സെലിബ്രിറ്റികളുടെ ശാരീരിക രൂപമാറ്റങ്ങളില്‍ നിര്‍ണായക പങ്കുവഹിച്ചയാളാണ് കൈസാദ്.
അസുഖത്തെ തുടര്‍ന്ന് ബുധനാഴ്ച രാവിലെ കൈസാദിനെ സാസൂന്‍ ജനറല്‍ ആശുപത്രിയില്‍ എത്തിച്ചെങ്കിലും മരിച്ചിരുന്നു. റാപ്പിഡ് ആന്‍റിജന്‍ ടെസ്റ്റിലാണ് കോവിഡ് ബാധ സ്ഥിരീകരിച്ചത്. കബഡി താരവും ഫിറ്റ്നസ് കോച്ചുമായ കല്യാണിയാണ് ഭാര്യ.
ഇന്ത്യയിലെ ഫിറ്റ്നസ് മേഖലയിലിലെ ഇതിഹാസങ്ങളില്‍ ഒരാളാണ് മരിച്ച കൈസാദ്. ഫിറ്റ്നസ് മേഖലയില്‍ ജോലി ആഗ്രഹിക്കുന്നവരെ വളര്‍ത്തിക്കൊണ്ടു വരാനായി 2003ലായിരുന്നു കൈസാദ് കെ 11 സ്കൂള്‍ ഓഫ് ഫിറ്റ്നസ് സയന്‍സ് സ്ഥാപിച്ചത്. നിരവധിയാളുകളുടെ ജീവിതത്തെ മാറ്റി മറിച്ച കൈസാദിന്‍റെ മരണം തീരാ നഷ്ടമായിരിക്കുകയാണ് ആയിരക്കണക്കിന് ശിഷ്യന്‍മാർക്കും സുഹൃത്തുക്കൾക്കും.
ഇന്‍സ്റ്റഗ്രാമില്‍ കൈസാദിന്‍റെ ചിത്രം പങ്കുവെച്ച ടൈഗര്‍ ഷ്റോഫ് വികാരാധീനനായി. ടൈഗര്‍ ഷ്റോഫിനെ കൂടാതെ മാതാവ് ആയേഷ ഷ്റോഫ്, സിദ്ധാന്ത് കപൂര്‍, നീല്‍ നിഥിന്‍ മുകേഷ്, ഡിയന്ന പണ്ഡേ, റുസ്ലാന്‍ മുംതാസ് തുടങ്ങിയ പ്രമുഖര്‍ അദ്ദേഹത്തെ അനുസ്മരിച്ചു.
Post Your Comments