കൊച്ചി : മലയാളിയുടെ പ്രിയ നടന്‍ മനോജ് കെ ജയന്‍ ആലപിച്ച ‘മക്ക മദീന മുത്തു നബീ’ എന്ന മാപ്പിളപ്പാട്ട് ശ്രദ്ധേയമാവുന്നു. വലിയ വീട്ടില്‍ ക്രിയേഷന്‍സിന്റെ ബാനറില്‍ വി ഐ പോള്‍ നിര്‍മ്മിച്ച ‘മക്കത്തെ ചന്ദ്രിക’ എന്ന ആല്‍ബത്തിന് വേണ്ടിയാണ് മനോജ് പാടിയിരിയ്ക്കുന്നത്. അഭിനയത്തിന്റെ വ്യത്യസ്ത ഭാവങ്ങൾ കൊണ്ട് പ്രേക്ഷകരെ അമ്പരപ്പിച്ച മനോജ് കെ ജയന്‍ നേരത്തെ ഹസ്ബീ റബ്ബീ എന്ന വൈറല്‍ ഗാനം ആലപിച്ച് തന്റെ സര്‍ഗ്ഗപ്രതിഭ തെളിയിച്ചിരുന്നു.
ദോഹയില്‍ പ്രവാസിയായ അന്‍ഷാദ് തൃശ്ശൂരാണ് ‘മക്കത്തെ ചന്ദ്രിക’ ഒരുക്കിയിട്ടുള്ളത്. ഫൈസല്‍ പൊന്നാനിയുടേതാണ് വരികള്‍. മെഗാസ്റ്റാര്‍ മമ്മൂട്ടിയുടെ ഫെയ്‌സ്ബുക്ക് പേജിലൂടെയാണ് ഈ ആൽബം റിലീസ് ചെയ്തത്. നടന്‍ സിദ്ധിക്ക്, നടനും സംവിധായകനുമായ രമേഷ് പിഷാരടി തുടങ്ങി നിരവധി പ്രമുഖരാണ് സമൂഹ മാധ്യമങ്ങളിലൂടെ ഇത് പങ്കു വെച്ചത്.
അഭിനയത്തിന് പുറമെ പിന്നണി ഗായകന്‍ എന്ന നിലയിലും മനോജ് കെ ജയന്‍ നേരത്തെ കഴിവ് തെളിയിച്ചിട്ടുള്ളതാണ്. അഞ്ചോളം സിനിമകള്‍ക്ക് മനോജ് കെ ജയന്‍ പിന്നണി പാടിയിട്ടുണ്ട്. ഇന്ദ്രജിത്ത് സുകുമാരന്‍ കേന്ദ്ര കഥാപാത്രമായി എത്തുന്ന ആഹ എന്ന ചിത്രമാണ് മനോജ് കെ ജയന്റെ അടുത്ത റിലീസ്. ദുല്‍ഖര്‍ സല്‍മാന് ഒപ്പം അഭിനയിച്ച സല്യൂട്ട് എന്ന ചിത്രവും റിലീസിന് തയ്യാറെടുക്കുകയാണ്.
Post Your Comments