മോഹന്‍ലാലിനെ നായകനാക്കി ബി ഉണ്ണികൃഷ്ണന്‍ സംവിധാനം ചെയ്യുന്ന ചിത്രമാണ് ആറാട്ട്. ഇപ്പോഴിതാ സിനിമയുടെ ഫൈറ്റ് സീനുകളെ കുറിച്ചും പാട്ടുകളെ കുറിച്ചുമുള്ള റിപ്പോര്‍ട്ടാണ് പുറത്തുവന്നിരിക്കുന്നത്. കേരള പ്രൊഡ്യൂസേഴ്‌സ് എന്ന ഫേസ്ബുക്ക് പേജിലാണ് ചിത്രവുമായി ബന്ധപ്പെട്ട വിവരങ്ങള്‍ റിപ്പോര്‍ട്ട് ചെയ്തിരിക്കുന്നത്.
ആറാട്ട് മോഹന്‍ലാല്‍ ആരാധകര്‍ക്ക് വേണ്ടിയുള്ള ഒരു മാസ് മസാല പടമായിരിക്കും. ചിത്രത്തില്‍ മുന്‍ മോഹന്‍ലാല്‍ ചിത്രങ്ങളിലെ മാസ് സീനുകളുടെ റെഫറെന്‍സ് ഉണ്ടായിരിക്കുമെന്നും റിപ്പോര്‍ട്ടില്‍ പറയുന്നു. നാല് മാസ് ഫൈറ്റ് സീനുകളും അഞ്ച് പാട്ടുകളുമാണ് ചിത്രത്തിലുള്ളത്. ചിത്രീകരണം മികവുറ്റതാണെങ്കിലും തീര്‍ച്ചയായും ആറാട്ട് തീയറ്റര്‍ തകര്‍ക്കുമെന്നാണ് കേരള പ്രൊഡ്യൂസേഴ്‌സ് ഫേസ്ബുക്ക് പേജ് റിപ്പോര്‍ട്ട് ചെയ്യുന്നത്.
https://www.facebook.com/Keralaproducers/posts/2627969020841086
അതേസമയം ആറാട്ട് ഒരു മാസ് എന്റര്‍ട്ടെയിനര്‍ ആയിരിക്കുമെന്ന് നേരത്തെ സംവിധായകന്‍ ബി ഉണ്ണികൃഷ്ണന്‍ അറിയിച്ചിരുന്നു. നെയ്യാറ്റിന്‍കര ഗോപന്‍ എന്ന കഥാപാത്രത്തെയാണ് ചിത്രത്തില്‍ മോഹന്‍ലാല്‍ അവതരിപ്പിക്കുന്നത്. നെയ്യാറ്റിന്‍കര ഗോപന്‍ ചില കാരണങ്ങളാല്‍ പാലക്കാട്ടെ ഒരു ഗ്രാമത്തില്‍ എത്തുകയാണ്. തുടര്‍ന്നുണ്ടാകുന്ന സംഭവങ്ങളിലൂടെയാണ് കഥ മുന്നോട്ട് കൊണ്ടുപോകുന്നത്.
വിജയ് ഉലകനാഥാണ് ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത്. എഡിറ്റര്‍ സമീര്‍ മുഹമ്മദാണ്. രാഹുല്‍ രാജ് സംഗീതം നല്‍കും. ജോസഫ് നെല്ലിക്കല്‍ കലാ സംവിധാനം നിര്‍വ്വഹിക്കുന്ന ചിത്രത്തിന്റെ വസ്ത്രാലങ്കാരം സ്റ്റെഫി സേവ്യറാണ്. ശ്രദ്ധ ശ്രീനാഥാണ് നായിക. നെടുമുടി വേണു, സായ്കുമാര്‍, സിദ്ദിഖ്, ജോണി ആന്റണി, ഇന്ദ്രന്‍സ്, രാഘവന്‍, നന്ദു, ബിജു പപ്പന്‍, ഷീല, സ്വാസിക, മാളവിക, രചന നാരായണന്‍ കുട്ടി, എന്നിവരാണ് ചിത്രത്തിലെ മറ്റു കഥാപാത്രങ്ങള്‍.
Post Your Comments