‘ടക് ജഗദീഷ്’ എന്ന സിനിമ ഒടിടിയ്ക്ക് നൽകിയതിൽ നടൻ നാനിയ്ക്കെതിരെ പ്രതിഷേധം അറിയിച്ച് ഫിലിം എക്സിബിറ്റേഴ്സ്. നാനിയുടെ സിനിമകൾ തിയറ്ററിൽ പ്രദർശിപ്പിക്കുന്നത് വിലക്കേർപ്പെടുത്തുമെന്നായിരുന്നു പ്രതിഷേധം അറിയിച്ചുകൊണ്ട് സംഘടന അറിയിച്ചത്. എന്നാൽ ഇനി വരുന്ന തന്റെ ചിത്രങ്ങൾക്ക് തിയറ്ററിൽ പ്രദർശനം വിലക്കിയാൽ അഭിനയം നിർത്തുമെന്ന് നാനി അറിയിച്ചു.
‘അവരുടെ അവസ്ഥയിൽ എനിക്ക് സഹതാപമുണ്ട്. അവർ അങ്ങനെ പ്രതികരിക്കുന്നതിൽ തെറ്റില്ല. തിയറ്റർ റിലീസിന് തന്നെയാണ് എന്നും എന്റെ പ്രഥമ പരിഗണന. കാര്യങ്ങൾ എല്ലാം സാധാരണ രീതിയിൽ ആയി, സിനിമകൾ തീയറ്ററിൽ പ്രദർശനത്തിന് എത്തി തുടങ്ങുമ്പോൾ എന്റെ വരാനിരിക്കുന്ന സിനിമകളിൽ ഏതെങ്കിലും ഒന്ന് തിയറ്റർ റിലീസ് ഒഴിവാക്കുകയാണെങ്കിൽ, ഞാൻ സിനിമ ചെയ്യുന്നത് നിർത്തും. സിനിമയിൽ നിന്ന് മാറി നിൽക്കും’ നാനി വ്യക്തമാക്കി.
അതേസമയം, ശിവ നിർവാണ സംവിധാനം ചെയ്യുന്ന ടക് ജഗദീഷിന്റെ ട്രെയ്ലർ പുറത്തിറങ്ങിയിട്ടുണ്ട്. ചിത്രം സെപ്റ്റംബർ 10ന് ആമസോൺ പ്രൈം വഴിയാണ് റിലീസിനെത്തുക. ഏപ്രിൽ 16ന് തീയറ്റർ റിലീസ് തീരുമാനിച്ചിരുന്ന ചിത്രം കോവിഡ് പ്രതിസന്ധിയെ തുടർന്നാണ് ഓടിടിയിൽ പ്രദർശനത്തിനെത്തുന്നത്. ഋതു വർമയും ഐശ്വര്യ രാജേഷുമാണ് ചിത്രത്തിലെ നായികമാർ.
Post Your Comments