മമ്മൂട്ടിയെ നേരിൽ കണ്ട് ആശംസ അറിയിച്ച് മന്ത്രി മുഹമ്മദ് റിയാസ്

കൊച്ചി : വെള്ളിത്തിരയിൽ 50 വര്‍ഷം പിന്നിട്ട നടൻ മമ്മൂട്ടിക്ക് ആശംസകളുമായി മന്ത്രി മുഹമ്മദ് റിയാസ്. മമ്മൂട്ടിയുടെ വീട്ടിലെത്തിയാണ് മന്ത്രി ആശംസ അറിയിച്ചത്. ഫേസ്ബുക്കിലൂടെ മുഹമ്മദ് റിയാസ് തന്നെയാണ് ഇക്കാര്യം അറിയിച്ചത്. മമ്മൂട്ടിക്കൊപ്പമുള്ള ചിത്രവും അദ്ദേഹം പങ്കുവെച്ചിട്ടുണ്ട്.

https://www.facebook.com/PAMuhammadRiyas/posts/1836629596539640

നേരത്തെ ബിജെപി. പാര്‍ട്ടി സംസ്ഥാന അധ്യക്ഷന്‍ കെ സുരേന്ദ്രൻ മമ്മൂട്ടിയുടെ വീട്ടിലെത്തി അദ്ദേഹത്തെ പൊന്നാട ചാര്‍ത്തി ആദരിച്ചിരുന്നു. കെ സുരേന്ദ്രനും ബിജെപി എറണാകുളം ജില്ലാ പ്രസിഡന്‍റ് ഉള്‍പ്പെടെയുള്ള നേതാക്കളാണ് മമ്മൂട്ടിയുടെ കൊച്ചിയിലെ വീട്ടില്‍ എത്തിയത്. ഒരു മണിക്കൂറോളം ചെലവഴിച്ചതിനു ശേഷമാണ് സുരേന്ദ്രനും മറ്റു ബിജെപി നേതാക്കളും മടങ്ങിയത്. സമ്മാനമായി ഓണക്കോടിയും സമ്മാനിച്ചിരുന്നു.

ഈ മാസം ആറിനാണ് മമ്മൂട്ടി സിനിമയില്‍ അന്‍പത് വര്‍ഷങ്ങള്‍ പൂര്‍ത്തിയാക്കിയത്. മമ്മൂട്ടി ആദ്യം സ്ക്രീനില്‍ പ്രത്യക്ഷപ്പെട്ട ‘അനുഭവങ്ങള്‍ പാളിച്ചകള്‍’ റിലീസ് ചെയ്യപ്പെട്ടത് 1971 ഓഗസ്റ്റ് ആറിനാണ്. സോഷ്യല്‍ മീഡിയയിലൂടെ നിരവധി ആരാധകരും സിനിമാപ്രവര്‍ത്തകരുമാണ് അദ്ദേഹത്തിന് ആശംസകൾ അറിയിച്ചത്.