17 വർഷങ്ങൾക്ക് ശേഷം വീണ്ടും റാമോജിയിൽ: ഓർമ്മകൾ പങ്കുവെച്ച് റോഷൻ ആൻഡ്രൂസ്

മലയാളത്തിലെ മികച്ച സംവിധായകരില്‍ ഒരാളാണ് റോഷന്‍ ആന്‍ഡ്രൂസ്. മോഹന്‍ലാലിനെ നായകനാക്കി ഒരുക്കിയ ഉദയനാണ് താരമാണ് ആദ്ദേഹം ആദ്യമായി സംവിധാനം ചെയ്യുന്ന ചിത്രം. അന്ന് സിനിമയിലെ ഏതാനും ഭാ​ഗങ്ങൾ ചിത്രീകരിച്ചത് റാമോജി ഫിലിം സിറ്റിയില്‍ വച്ചായിരുന്നു. ഇപ്പോഴിതാ 17 വര്‍ഷത്തിനു ശേഷം വീണ്ടും റാമോജിയിൽ എത്തിയ അനുഭവം പങ്കുവയ്ക്കുകയാണ് റോഷൻ ആൻഡ്രൂസ്.

‘എന്റെ ആദ്യ ചിത്രം ഉദയനാണുതാരം കഴിഞ്ഞു 17 വര്‍ഷങ്ങള്‍ക്ക് ശേഷം ഞാന്‍ റാമോജി ഫിലിം സിറ്റി സന്ദര്‍ശിച്ചു. ദൈവത്തിനു നന്ദി. ഞാന്‍ ഇപ്പോഴും ഈ ഇന്റസ്ട്രിയിലുണ്ട്. ഒരുപാട് ഓര്‍മകളും. എല്ലാ സിനിമാപ്രേമികള്‍ക്കും ആ സിനിമ ഇഷ്ടമാണെന്ന് പ്രതീക്ഷിക്കുന്നു. 17 വര്‍ഷങ്ങള്‍… ഇപ്പോള്‍ ഞാന്‍ ദുല്‍ഖറിനെ വെച്ച് സിനിമ സംവിധാനം ചെയ്യുകയാണ്. സൃഷ്ടികര്‍ത്താവിനു സല്യൂട്ട്’, എന്നാണ് ചിത്രം പങ്കുവെച്ച് റോഷന്‍ ആന്‍ഡ്രൂസ് കുറിച്ചിരിക്കുന്നത്.

https://www.facebook.com/RosshanAndrrews/posts/357606665737211

2005-ലാണ് ഉദയനാണ് താരം പുറത്തിറങ്ങിയത്. മലയാള സിനിമാ ലോകത്തെക്കുറിച്ച് ഹാസ്യാത്മകമായി പരാമർശിക്കുന്ന ചിത്രത്തിൽ മോഹൻലാൽ, ശ്രീനിവാസൻ, മീന, മുകേഷ്, ജഗതി തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിച്ചത്.

ദുല്‍ഖര്‍ നായകനായി എത്തുന്ന സല്യൂട്ടാണ് റോഷന്‍ ആന്‍ഡ്രൂസിന്റെ പുതിയ ചിത്രം. മുംബൈ പൊലീസിനു ശേഷം അദ്ദേഹം ഒരുക്കുന്ന പൊലീസ് ത്രില്ലറാണ് ഇത്.