സൽമാൻ ഖാന് ഭാര്യയും മകളുമുണ്ട്, വിദേശത്ത് ഒളിപ്പിച്ച് താമസിപ്പിച്ചിരിക്കുകയാണെന്ന് ആരോപണം: മറുപടിയുമായി താരം

മുംബൈ: ബോളിവുഡ് നടൻ സൽമാൻ ഖാന് ഭാര്യയും 17 വയസുള്ള മകളുമുണ്ടെന്ന് ആരോപണം. തന്റെ രഹസ്യ കുടുംബത്തെ സൽമാൻ ഖാൻ ദുബായിയിൽ ഒളിപ്പിച്ച് താമസിപ്പിച്ചിരിക്കുകയാണെന്നും സാമൂഹിക മാദ്ധ്യമത്തിൽ വന്ന ഒരു കമന്റിൽ പറയുന്നു. താരത്തിന്റെ ഭാര്യയുടെ പേര് നൂർ എന്നാണെന്നും ഇവർക്ക് 17 വയസുള്ള ഒരു മകളുണ്ടെന്നും ഇവരെ കാണുന്നതിനു വേണ്ടിയാണ് സൽമാൻ ഖാൻ ഇടക്കിടക്ക് വിദേശ യാത്ര നടത്തുന്നതെന്നുമായിരുന്നു കമന്റ്. എന്നാൽ സംഭവം ശ്രദ്ധയിൽപ്പെട്ട സൽമാന്റെ സഹോദരൻ കൂടിയായ അർബാസ് ഖാൻ ഇക്കാര്യം താരത്തിന്റെ ശ്രദ്ധയിപ്പെടുത്തുകയായിരുന്നു. ഇതോടെ സംഭവത്തിൽ വിശദീകരണവുമായി സൽമാൻ തന്നെ നേരിട്ടെത്തിയിരിക്കുകയാണ്.

താൻ ഇപ്പോഴും അവിവാഹിതനാണെന്നും ഇത്തരം കമന്റുകൾ താൻ നിത്യേന കേൾക്കുന്നതിനാൽ ഇതൊന്നും അത്ര കാര്യമാക്കാറില്ലെന്നും ആരോപണം നിഷേധിച്ചുകൊണ്ട് സൽമാൻ ഖാൻ പറഞ്ഞു. ഇത്തരക്കാർക്ക് ഈ വിവരങ്ങൾ എവിടെനിന്നും കിട്ടുന്നു എന്ന് തനിക്ക് അറിയില്ലെന്നും താരം പറയുന്നു. തന്റെ ഒൻപതാം വയസു മുതൽ ഇന്ത്യയിൽ ഗാലക്സി അപാർട്ട്മെന്റിലെ താമസക്കാരനാണെന്നും ആരോട് വേണമെങ്കിലും ഇതിനെകുറിച്ച് അന്വേഷിക്കാമെന്നും താരം പറഞ്ഞു.