ദിലീഷ് പോത്തന്‍റെ ‘ജോജി’ എന്ന സിനിമയിലെ നടൻ ബാബുരാജിന്റെ പ്രകടനം ഏറെ ശ്രദ്ധിക്കപ്പെട്ടിരുന്നു. നിരവധി പേരാണ് താരത്തെ പ്രശംസിച്ചുകൊണ്ട് എത്തിയത്. ഇപ്പോഴിതാ തമിഴ് നടൻ വിശാലിനും ജോജിയിലെ ജോമോൻ എന്ന ബാബുരാജിന്റെ കഥാപാത്രത്തെ ഇഷ്ടമായിരിക്കുകയാണ്. കൂടാതെ തന്റെ പുതിയ ചിത്രത്തിലേക്കും ബാബുരാജിനെ വിശാൽ ക്ഷണിച്ചതായാണ് റിപ്പോർട്ട്.
തുപ ശരവണന്‍റെ സംവിധാനത്തില്‍ വിശാല്‍ നായകനാവുന്ന ചിത്രത്തിലാണ് ബാബുരാജ് അഭിനയിക്കുന്നത്. ഏപ്രില്‍ ആദ്യം പ്രഖ്യാപിച്ച ചിത്രത്തിൽ നായികയാവുന്നത് തെലുങ്ക്, തമിഴ് താരം ഡിംപിള്‍ ഹയതിയാണ്. ചിത്രത്തിലേക്ക് ക്ഷണിക്കാനായി വിശാല്‍ തന്നെയാണ് തന്നെ ഫോണില്‍ വിളിച്ചതെന്നും ബാബുരാജ് ഏഷ്യാനെറ്റ് ന്യൂസിനോട് പറഞ്ഞു.
30 ദിവസത്തെ ഡേറ്റ് ആണ് ബാബുരാജ് നല്‍കിയിരിക്കുന്നത്. ഹൈദരാബാദ് കൂടാതെ ചെന്നൈയിലും കുറച്ച് ഭാഗം ചിത്രീകരിക്കുമെന്നാണ് അറിയുന്നത്. കവിന്‍ രാജ് ഛായാഗ്രഹണം നിര്‍വ്വഹിക്കുന്ന ചിത്രത്തില്‍ രവീണ രവിയും അഭിനയിക്കുന്നുണ്ട്. സംഗീതം യുവന്‍ ഷങ്കര്‍ രാജ. എഡിറ്റിംഗ് എന്‍ ബി ശ്രീകാന്ത്. ഓഡിയോഗ്രഫി തപസ് നായക്.
നേരത്തെ അജിത്ത് നായകനായ ‘ജന’യിലും വിക്രം നായകനായ ‘സ്കെച്ചി’ലും ബാബുരാജ് അഭിനയിച്ചിട്ടുണ്ട്.
Post Your Comments