ലൂസിഫർ എന്ന വമ്പൻ ചിത്രത്തിന് ശേഷം വീണ്ടും പൃഥ്വിരാജ് – മുരളി ഗോപി കൂട്ടുകെട്ടിൽ പിറക്കുന്ന ചിത്രത്തിൽ നായകനാകുന്നത് മറ്റൊരു സൂപ്പർ സ്റ്റാർ. ആരാധകർ ഒന്നടങ്കം കാത്തിരുന്ന പ്രഖ്യാപനമാണ് ഇപ്പോൾ നടനും തിരക്കഥാകൃത്തുമായ മുരളി ഗോപി നടത്തിയിരിക്കുന്നത്. റെഡ് എഫ്എമ്മുമായി നടന്ന ഒരു അഭിമുഖത്തിലാണ് അദ്ദേഹം ഇക്കാര്യം വെളിപ്പെടുത്തിയിരിക്കുന്നത്.
മമ്മൂട്ടിയായിരിക്കും തങ്ങളുടെ അടുത്ത ചിത്രത്തിൽ നായകൻ എന്ന് മുരളി ഗോപി വ്യക്തമാക്കി. മമ്മൂട്ടിക്കൊപ്പമുള്ള സിനിമ ഏറെ നാളായി തങ്ങളുടെ മനസ്സില്‍ ഉണ്ടെന്നും അത് ഉറപ്പായും സംഭവിക്കുമെന്നും മുരളി പറഞ്ഞു. ചിത്രം മെഗാ സ്റ്റാറിനുള്ള ട്രിബ്യൂട്ട് ആയിരിക്കുമെന്ന് മുരളി കൂട്ടിച്ചേര്‍ത്തു.
തന്റെ അടുത്ത തിരക്കഥ മമ്മൂട്ടിയ്ക്കുള്ളതായിരിക്കും എന്ന് നേരത്തെ മുരളി ഗോപി വെളിപ്പെടുത്തിയിരുന്നു. എന്നാൽ അത് പൃഥ്വിരാജ് കൂട്ടുകെട്ടിന് വേണ്ടിയുള്ളതാണെന്ന സൂചനയാണ് ഇപ്പോൾ നൽകുന്നത്.
നിരവധി പ്രോജക്ടുകളാണ് മുരളി ഗോപിയുടേതായി അണിയറയിൽ ഒരുങ്ങുന്നത്. പൃഥ്വിരാജ് നായകനാകുന്ന രതീഷ് അമ്പാട്ട് ചിത്രം തീര്‍പ്പിന്റെ തിരക്കഥ മുരളിയുടേതാണ്. അതിനുശേഷം മോഹന്‍ലാല്‍- പൃഥ്വിരാജ് കൂട്ടുകെട്ടിന്റെ എമ്പുരാന്‍, ഫ്രൈഡേ ഫിലിംസിന്റെ മമ്മൂട്ടി ചിത്രം തുടങ്ങിയവയ്ക്കും മുരളിയാണ് തിരക്കഥ തയ്യാറാക്കുന്നത്. ഇതിനെല്ലാം ശേഷം മാത്രമേ പൃഥ്വിരാജ് സംവിധാനം ചെയ്യുന്ന മമ്മൂട്ടി ചിത്രം ഉണ്ടാവുകയുള്ളു.
മമ്മൂട്ടി നായകനായെത്തിയ വണ്ണാണ് മുരളി ഗോപിയുടേതായി പുറത്തിറങ്ങിയ അവസാന ചിത്രം. പ്രതിപക്ഷ നേതാവ് മാറമ്പള്ളി ജയാനന്ദന്‍ എന്ന കഥാപാത്രത്തെയാണ് മുരളി സിനിമയിൽ അവതരിപ്പിച്ചിരിക്കുന്നത്.
Post Your Comments