വണ്ണിന്റെ ട്രെയിലർ പുറത്ത്; മുഖ്യമന്ത്രി കടയ്ക്കൽ ചന്ദ്രനായി മമ്മൂട്ടി എത്തുന്നു

മമ്മൂട്ടി നായകനായെത്തുന്ന വണ്ണിന്റെ ട്രെയിലർ പുറത്ത്. മലയാളി പ്രേക്ഷകർ ഒന്നടങ്കം കാത്തിരിക്കുന്ന ചിത്രമാണ് വൺ. കേരള മുഖ്യമന്ത്രി കടയ്ക്കൽ ചന്ദ്രനായാണ് ചിത്രത്തിൽ മമ്മൂട്ടിയെത്തുന്നത്. പൊളിറ്റിക്കൽ എന്റർടെയ്‌നർ സ്വഭാവമുള്ള വൺ സന്തോഷ് വിശ്വനാഥാണ് സംവിധാനം ചെയ്തിരിക്കുന്നത്. മമ്മൂട്ടിയും, മോഹൻലാലും, സുരേഷ്‌ഗോപിയും അടക്കമുള്ള നിരവധി മലയാള താരങ്ങൾ ചേർന്നാണ് ട്രെയിലർ പുറത്ത് വിട്ടിരിക്കുന്നത്.

മുഖ്യമന്ത്രിയുടെ കൃത്യമായ നീക്കുപോക്കുകളും ഇതിനെതിരെ, പ്രതിപക്ഷം നടത്തുന്ന കരുനീക്കങ്ങളുമൊക്കെ അടങ്ങിയ കംപ്ലീറ്റ് രാഷ്ട്രീയ സിനിമയാണ് വൺ എന്ന് ട്രെയിലർ വ്യക്തമാക്കുന്നു. നടി അഹാനയുടെ സഹോദരി ഇഷാനി കൃഷ്ണയും അലൻസിയറും ഗായത്രിയും നിമിഷ സജയനും മുരളി ഗോപിയും ജഗദീഷും ഉൾപ്പെട്ടിട്ടുള്ള ട്രെയിലറാണ് പുറത്തുവന്നിട്ടുള്ളത്.

ബാലചന്ദ്ര മേനോൻ, മധു എന്നിവർ അതിഥി താരങ്ങളായെത്തുന്ന ചിത്രത്തിൽ ജോജു ജോർജ്, സംവിധായകൻ രഞ്ജിത്ത്, സിദ്ധിഖ്, മാത്യു തോമസ്, സലിം കുമാർ, ശങ്കർ രാമകൃഷ്ണൻ, മാമുക്കോയ,ജഗദീഷ്, പി.ബാലചന്ദ്രൻ ,കൃഷ്ണ കുമാർ ,സുധീർ കരമന, റിസബാവ, സാദിഖ്, മേഘനാദൻ, അലൻസിയർ, സുരേഷ് കൃഷ്ണ, പ്രേംകുമാർ, നന്ദു ജയൻ ചേർത്തല, വി.കെ. ബൈജു, തുടങ്ങി നിരവധി താരങ്ങൾ കഥാപാത്രങ്ങളായി എത്തുന്നുണ്ട്.