വളരെ ബോൾഡാണ്, മേക്കപ്പ് ഒട്ടും ഉപയോഗിച്ചിട്ടില്ല ; അശ്വതിയെക്കുറിച്ച് നമിത പറയുന്നു

പ്രേഷകരുടെ പ്രിയപ്പെട്ട നടിയാണ് നമിത പ്രമോദ്. നിരവധി ചിത്രങ്ങളിൽ തിളങ്ങിയ താരം ഇടക്കാലത്ത് സിനിമയിൽ സജീവമല്ലാതെയായി. തുടർച്ചയായി സിനിമകൾ പരാജയപ്പെടാൻ തുടങ്ങിയതോടെ അഭിനയത്തിൽ നിന്ന് വിട്ടു നിൽക്കാൻ വരെ തീരുമാനിച്ചതായി നമിത പറഞ്ഞിരുന്നു. എന്നാൽ ഇപ്പോൾ നമിതയ്ക്ക് നല്ലൊരു കഥാപാത്രം വീണ്ടും ലഭിച്ചിരിക്കുകയാണ്.

നാദിർഷ സംവിധാനം ചെയ്യുന്ന ‘ഗാന്ധി സ്ക്വയർ’ എന്ന ചിത്രത്തിൽ  നായികയായിട്ടാണ് നമിത ഇപ്പോൾ എത്തുന്നത് . സിനിമയിൽ അഭിഭാഷകയായ അശ്വതി എന്ന കഥാപാത്രത്തെയാണ് നമിത അവതരിപ്പിക്കുന്നത്. തന്റെ പുതിയ കഥാപാത്രത്തിന്റെ വിശേഷങ്ങൾ മനോരമ ഓൺലൈനു നൽകിയ അഭിമുഖത്തിലൂടെ തുറന്നു പറയുകയാണ് നമിത.

നമിതയുടെ വാക്കുകൾ

അശ്വതി എന്ന കഥാപാത്രം ഇതുവരെ ചെയ്തിട്ടില്ലാത്ത തരത്തിലുള്ള കഥാപാത്രമാണ്. വളരെ ബോൾഡ് ആയി കാര്യങ്ങൾ കൈകാര്യം ചെയ്യാൻ കഴിവുള്ള ആളാണ് അശ്വതി. ഇതിൽ കഥാപാത്രങ്ങൾ മേക്കപ്പ് ഉപയോഗിച്ചിട്ടില്ല. നാദിർഷ ഇതുവരെ ചെയ്തിച്ചുള്ള സിനിമകളിൽ നിന്ന് വ്യത്യസ്തമാണ് ‘ഗാന്ധി സ്ക്വയർ’. കളർഫുൾ പാറ്റേണിൽ നിന്നു വ്യത്യസ്തമായാണ് ഈ സിനിമ ഒരുക്കിയിരിക്കുന്നത്. എന്റർടെയ്ൻമെന്റിനെക്കാൾ കഥയ്ക്കാണ് ചിത്രം പ്രാധാന്യം നൽകുന്നത്.

നാദിർഷ ഇതുവരെ പരീക്ഷിച്ചിട്ടില്ലാത്ത ത്രില്ലർ വിഭാഗത്തിൽപെടുന്ന സിനിമയാണിത്. ജയസൂര്യയാണ് നായകൻ. ഒറ്റ രാത്രികൊണ്ട് നടക്കുന്ന സംഭവങ്ങളാണ് സിനിമയുടെ ഇതിവൃത്തം. സാമൂഹിക പ്രാധാന്യമുള്ള വിഷയമാണ് ചിത്രം ചർച്ച ചെയ്യുന്നത്.

ഇടുക്കിയിലെ വിവിധ മേഖലകളിലാണ് സിനിമ ചിത്രീകരിച്ചിരിക്കുന്നത്. സിനിമയുടെ അവസാനഘട്ട ഒരുക്കങ്ങൾ നടന്നുകൊണ്ടിരിക്കുകയാണ്. രചന നിർവഹിച്ചിരിക്കുന്നത് സുരേഷ് വാര്യനാടാണ്. ഛായാഗ്രഹണം സുജിത് വാസുദേവാണ്.