‘ലയനം’ ചെയ്തത് കൊണ്ട് ജയറാം എനിക്ക് ഡേറ്റ് നൽകിയില്ല: വെളിപ്പെടുത്തലുമായി തുളസീദാസ്

മലയാളത്തിലെ എല്ലാ സൂപ്പർ താരങ്ങളെയും നായകനാക്കി സിനിമ ചെയ്ത സംവിധായകനാണ് തുളസീദാസ്. മമ്മൂട്ടി, മോഹൻലാൽ, സുരേഷ് ഗോപി, മുകേഷ്, ജയറാം, പൃഥ്വിരാജ്, ദിലീപ്, ജയസൂര്യ, കുഞ്ചാക്കോ ബോബൻ തുടങ്ങിയ മലയാളത്തിലെ പ്രമുഖ താരങ്ങളെയെല്ലാം നായകനാക്കി സിനിമ ചെയ്ത തുളസീദാസ് ജയറാമിൽ നിന്ന് തനിക്ക് നേരിട്ട വിഷമകരമായ ഒരു അനുഭവത്തെക്കുറിച്ച് വെളിപ്പെടുത്തുകയാണ്. തന്റെ രണ്ടാമത്തെ ചിത്രമായ ‘ലയനം’ ചെയ്തു കഴിഞ്ഞു അടുത്ത ഒരു സിനിമ പ്ലാൻ ചെയ്തപ്പോൾ ജയറാമിനെയാണ് അതിൽ നായകനാക്കാൻ തീരുമാനിച്ചതെന്നും എന്നാൽ ഒരു ഹോട്ട് മൂവി ചെയ്തു നിൽക്കുന്ന തനിക്ക് ജയറാം അന്ന് ഡേറ്റ് നൽകിയില്ലെന്നും തുളസീദാസ് ഒരു ടിവി ചാനൽ അഭിമുഖത്തിൽ സംസാരിക്കവെ വെളിപ്പെടുത്തുന്നു.

തുളസീദാസിന്റെ വാക്കുകള്‍

“കൗതുക വാർത്തകൾ എന്ന സിനിമ പ്ലാൻ ചെയ്തപ്പോൾ അതിൽ ജയറാമിനെയാണ് ഹീറോയാക്കാൻ തീരുമാനിച്ചത്. അങ്ങനെ ‘മാലയോഗം’ എന്ന സിനിമയുടെ ലൊക്കേഷനിൽ പോയി ജയറാമിനെ കണ്ടു. പക്ഷെ ‘ലയനം’ എന്ന സിനിമയുടെ സംവിധായകൻ എന്ന നിലയിൽ ജയറാം എനിക്ക് ഡേറ്റ് തരാൻ തയ്യാറായില്ല. അങ്ങനെ ജയറാമിന് വച്ചിരുന്ന റോൾ മുകേഷിന് നൽകി. മുകേഷിന് വച്ചിരുന്ന റോൾ സുരേഷ് ഗോപിക്കും നൽകി. ‘കൗതുക വാർത്തകൾ’ സൂപ്പർ ഹിറ്റായി ഓടുകയും ചെയ്തു”.