സത്യസായി ബാബയായി അനൂപ് ജലോട്ട ; സിനിമയിലെ ചിത്രങ്ങൾ ശ്രദ്ധ നേടുന്നു

സത്യസായി ബാബയുടെ ജീവചരിത്ര സിനിമയിൽ ഗായകനും പത്മശ്രീ അവാർഡ് ജേതാവുമായ അനൂപ് ജലോട്ട കേന്ദ്ര കഥാപാത്രത്തെ അവതരിപ്പിക്കും. ചിത്രത്തിൽ നിന്നുള്ള സ്റ്റിൽസ് ആണ് ഇപ്പോൾ ശ്രദ്ധേയമാവുന്നത്. വിക്കി റണാവത്താണ് ചിത്രത്തിന്റെ സംവിധായകൻ.

ഏറെ നാളുകൾക്ക് ശേഷം അഭിനയത്തിലേക്ക് മടങ്ങിയെത്താൻ കാരണമായത് വിക്കി റണാവത്ത് ചിത്രത്തിൽ സത്യസായി ബാബയുടെ വേഷം വാഗ്ദാനം ചെയ്തതാണെന്ന് അനൂപ് ജലോട്ട പറയുന്നു.

“സത്യസായിബാബയെ അവതരിപ്പിക്കാൻ അവസരം ലഭിച്ചതിൽ ഞാൻ സന്തുഷ്ടനാണ്, കാരണം അദ്ദേഹത്തിന്റെ ആശയങ്ങളിലും തത്വങ്ങളിലും ഞാൻ വിശ്വസിച്ചിട്ടുണ്ട്. ഞാൻ അദ്ദേഹത്തെ സൂക്ഷ്മമായി നിരീക്ഷിക്കുകയും അദ്ദേഹത്തെക്കുറിച്ച് ധാരാളം വായിക്കുകയും ചെയ്തിട്ടുണ്ട്. ഇതെനിക്ക് ഒരു വെല്ലുവിളിയാണ്”.അനൂപ് ജലോട്ട പറയുന്നു.

സാധിക രന്ധവ, ജാക്കി ഷ്രോഫ്, ഗോവിന്ദ് നംദേവ്, അരുൺ ബക്ഷി, മുഷ്താഖ് ഖാൻ എന്നിവരും പ്രധാന വേഷങ്ങളിൽ അഭിനയിക്കുന്നു. സുധക്കർ ശർമ്മയുടെ വരികൾക്ക് സംഗീതം നൽകിയത് ബാപ്പി ലാഹിരി, സുമീത് തപ്പു എന്നിവരാണ്. എ വൺ ക്രിയേഷന്റെ ബാനറിൽ ബാൽകൃഷ്ണ ശ്രീവാസ്തവ് ആണ് ചിത്രം നിർമ്മിക്കുന്നത്.