അമല പോളിനൊപ്പമുള്ള ചിത്രങ്ങൾ പ്രചരിപ്പിക്കരുത് ; മുൻ കാമുകന് മദ്രാസ് ഹൈക്കോടതിയുടെ വിലക്ക്

ചെന്നൈ: നടി അമലാ പോളിനൊപ്പമുള്ള ചിത്രങ്ങൾ പ്രസിദ്ധീകരിക്കുന്നതിൽ മുൻ കാമുകനും മുംബൈ സ്വദേശിയുമായ സംഗീതജ്ഞൻ ഭവനീന്ദർ സിംഗിന് വിലക്കേർപ്പെടുത്തി മദ്രാസ് ഹൈക്കോടതി. ഫോട്ടോഷൂട്ടിനായി എടുത്ത ചിത്രം സമൂഹമാധ്യമങ്ങളിലൂടെ പ്രചരിപ്പിക്കുകയായിരുന്നുവെന്നും, ഇത് തന്നെ അപമാനിക്കുന്ന തരത്തിലുള്ളതാണെന്നുമുള്ള അമല നൽകിയ ഹർജിയിലാണ് ഹൈക്കോടതിയുടെ ഉത്തരവ്.

ഈ വർഷം മാർച്ചിൽ എടുത്ത പരമ്പരാഗത വസ്ത്രങ്ങൾ ധരിച്ചുള്ള ചില ചിത്രങ്ങളാണ് ഭവനീന്ദർ ഇൻസ്റ്റാഗ്രാമിലൂടെ പുറത്തുവിട്ടത്. ഇതോടെ അമലയുടെയും ഭവനീന്ദറിന്‍റെയും വിവാഹം കഴിഞ്ഞെന്ന പ്രചാരണം വ്യാപിക്കുകയായിരുന്നു. പിന്നീട് ഭവനീന്ദർ ഈ ചിത്രങ്ങൾ ഡിലീറ്റ് ചെയ്തെങ്കിലും ചിത്രങ്ങൾ സമൂഹമാധ്യമങ്ങളിൽ വലിയ രീതിയിൽ വൈറലായി.

ഇതോടെ അമല ഭവനീന്ദറിനെതിരെ രംഗത്തെത്തുകയായിരുന്നു. ഒരു പ്രൊഫഷണൽ ആവശ്യത്തിനായി എടുത്ത ചിത്രങ്ങളാണെന്നും, ഈ ചിത്രങ്ങൾ ഇനി ഭവനീന്ദർ പ്രസിദ്ധീകരിക്കരുതെന്നും അമല ഹർജിയിൽ ആവശ്യപ്പെട്ടു.

തമിഴ് ചിത്രമായ ആടൈ ആയിരുന്നു അമലയുടെ റിലീസായ അവസാനത്തെ ചിത്രം. ‘അതോ അന്ത പറവൈ പോല’, കഡാവർ എന്നിവയാണ് ഇനി പുറത്തുവരാനുള്ള ചിത്രങ്ങൾ.