ആക്ഷൻ ഹീറോ ബാബു ആന്റണിയെ നായകനാക്കി ഒമര്‍ലുലു സംവിധാനം ചെയ്യുന്ന ‘പവര്‍സ്റ്റാര്‍’ ചിത്രത്തില്‍ നടന്‍ ബിനീഷ് ബാസ്റ്റിനും വേഷമിടും, പ്രണയമോ നായികയോ ഗാനങ്ങളോ ഇല്ലാത്ത ചിത്രമാണ് പവര്‍ സ്റ്റാര്‍ എന്ന ഒമറിന്റെ വെളിപ്പെടുത്തല്‍ സോഷ്യല്‍ മീഡിയ ഏറ്റെടുത്തിരുന്നു. ബാബു ആന്റണിക്കൊപ്പം ബാബുരാജ്, അബു സലിം, റിയാസ് ഖാന്‍ എന്നിവരാണ് പ്രധാന വേഷങ്ങളില്‍ എത്തുക.
ഈ വാര്‍ത്ത പങ്കുവച്ച് തനിക്കും ഇവര്‍ക്കൊപ്പം അഭിനയിക്കാന്‍ ആഗ്രഹമുണ്ടെന്നാണ് ബിനീഷ് ബാസ്റ്റിന്‍ ഫെയ്‌സ്ബുക്കില്‍ കുറിച്ചത്. ”ടീമേ…ഇവരെല്ലാവരും മലയാളികള്‍ക്ക് ഏറ്റവും ഇഷ്ടപ്പെട്ട വില്ലന്മാര്‍.. ഈ കാസ്റ്റിംഗ് കണ്ടപ്പോള്‍..എനിക്കും ഇവരുടെ കൂടെ ഈ സിനിമയില്‍. ഒരു വേഷം ചെയ്യാന്‍ കൊതിയാവുന്നു….. ആരോട് പറയാന്‍..?? ആരു കേള്‍ക്കാന്‍……..നിങ്ങള്‍ പറ ടീമേ” എന്നായിരുന്നു ബിനീഷിന്റെ പോസ്റ്റ് വന്നത്.
എന്നാൽ താമസിയാതെ മറുപടിയുമായി ഒമര്‍ലുലുവും എത്തി. ”ഈ സിനിമയില്‍ നല്ലൊരു വേഷം നിങ്ങള്‍ക്ക് ഉണ്ടാവും” എന്നായിരുന്നു ഒമറിന്റെ മറുപടി. ഇത് വൈറലായതോടെ ബിനീഷ് ഒമര്‍ലുലുവിനെ സന്തോഷം അറിയിച്ചു. മംഗലാപുരം, കാസര്‍ഗോഡ്, കൊച്ചി എന്നിവടങ്ങളാണ് ചിത്രത്തിന്റെ ലൊക്കേഷനുകള്‍. കൊക്കെയ്ന്‍ വിപണിയാണ് സിനിമയുടെ പശ്ചാത്തലമായി വരുക.
Post Your Comments