ഹോം ക്വാറന്റൈനിലാണ് അമ്മ, ഭാര്യയും മോളും വീട്ടിലില്ല! ലോക് ഡൗണ്‍ ദിനങ്ങളെക്കുറിച്ച് ടോവിനോ

മലയാളത്തിന്റെ യുവതാരങ്ങളില്‍ ശ്രദ്ധിക്കപ്പെട്ട നടനാണ്‌ ടൊവിനോ തോമസ്. കേരളത്തിന്റെ ദുരിതാശ്വസ പ്രവര്‍ത്തനങ്ങളില്‍ സജീവമാണ് താരം. പ്രളയകാലത്തും കൊറോണ സമയത്തും കൈത്താങ്ങായി ടോവിനോ എത്തുന്നുണ്ട്. രാജ്യത്ത് ലോക് ഡൗണ്‍ പ്രഖ്യാപിച്ചതോടെ ഷൂട്ടിംഗ് പൂര്‍ണ്ണമായും നിര്‍ത്തി വച്ചിരിക്കുന്ന ഒരു അവസ്ഥയാണ്‌. വീട്ടിലിരിക്കാനുള്ള നിര്‍ദേശം പാലിക്കുകയെന്ന ഉത്തരവാദിത്തമാണ് നമുക്ക് ഇപ്പോഴുള്ളതെന്ന് മാതൃഭൂമിക്ക് നല്‍കിയ അഭിമുഖത്തില്‍ ടൊവിനോ പറയുന്നു. മനസ്സിലാണ് ആഘോഷങ്ങളുടെ തിരി തെളിയുന്നതെന്നും അമ്മയുണ്ടാക്കുന്ന വിഭവങ്ങളില്ലാത്ത ഈസ്റ്ററായിരുന്നു കഴിഞ്ഞുപോയതെന്നും താരം പങ്കുവച്ചു.

ഈസ്റ്ററിന് എല്ലാവരും ഒരുമിച്ച്‌ കൂടുന്ന പതിവാണ് തങ്ങളുടേതെന്ന് ടൊവിനോ പറഞ്ഞു. ” രുചികരമായ വിഭവങ്ങളാണ് ഈസ്റ്ററിന് അമ്മ ഉണ്ടാക്കാറുള്ളത്. ആ ദിവസത്തെ പ്രധാന പ്രത്യേകതയും അത് തന്നെയാണ്. ഇത്തവണത്തെ വലിയ നഷ്ടവും അതായിരുന്നു. അമ്മയുണ്ടാക്കുന്ന വിഭവങ്ങളില്ലാതെയായിരുന്നു ഈസ്റ്റര്‍ കടന്നുപോയത്. ആഘോഷങ്ങള്‍ക്കെല്ലാം പരിധി നിശ്ചയിക്കേണ്ടി വന്നതിനാലാണ് ഇങ്ങനെ സംഭവിച്ചത്. അനിയത്തിയുടെ ചികിത്സയ്ക്കായി അമ്മയും വെല്ലൂരിലേക്ക് പോയിരുന്നു. കഴിഞ്ഞ ദിവസമാണ് വീട്ടിലേക്ക് തിരിച്ചെത്തിയത്. ഹോം ക്വാറന്റൈനിലാണ് അമ്മ ഇപ്പോള്‍. കുട്ടികളെ വീട്ടില്‍ നിര്‍ത്തണ്ട എന്ന് തീരുമാനിച്ചിരുന്നു. ഭാര്യയും കുഞ്ഞും ചേട്ടന്റെ ഭാര്യയും കുടുംബവും അവരുടെ വീടുകളിലേക്ക് പോവുകയായിരുന്നു. ഈസ്റ്ററിന് അവര്‍ വീട്ടിലില്ലാത്തതും സങ്കടമുള്ള കാര്യമാണ്. ” താരം പങ്കുവച്ചു.