എനിക്ക് സ്വീകരണം നല്‍കണമെങ്കില്‍ മമ്മൂട്ടിയും മോഹന്‍ലാലും വരണമെന്ന് പറ്റില്ലെന്ന് ഞാന്‍ തുറന്നു പറഞ്ഞു

മലയാള സിനിമയില്‍ ക്ലാസ് ചിത്രങ്ങളും മാസ് ചിത്രങ്ങളും സമ്മാനിച്ച സംവിധായകനാണ് ഭദ്രന്‍. ഒരിക്കല്‍ തനിക്ക് ഒരു സ്വീകരണം ഒരുക്കണം എന്ന് തന്റെ നാട്ടിലെ പ്രശസ്തരായ ആളുകള്‍ പറഞ്ഞപ്പോള്‍ അവരുടെ പിന്നിലെ താത്പര്യത്തിന് പിന്നില്‍ മറ്റൊരു കാരണം കൂടിയുണ്ടായിരുന്നുവെന്ന് തുറന്നു പറയുകയാണ് ഭദ്രന്‍. മമ്മൂട്ടിയേയും മോഹന്‍ലാലിനെയും ഒന്നിച്ച് ഒരേ വേദിയില്‍ കൊണ്ട് വരണം എന്ന അവരുടെ ആവശ്യത്തെ താന്‍ നിരാകരിക്കുകയായിരുന്നുവെന്ന് ഭദ്രന്‍ ഒരു ടെലിവിഷന്‍ ഷോയ്ക്ക് നല്‍കിയ അഭിമുഖത്തില്‍ തുറന്നു പറയുന്നു.

‘പാലായിലെ  പല പ്രശസ്തരും  എന്നോട് പറഞ്ഞിട്ടുണ്ട് നിങ്ങൾ മലയാളത്തിൽ  വലിയ സിനിമകളൊക്കെ  ചെയ്തിട്ടും പാല മുൻസിപ്പാലിറ്റിക്ക്  നിങ്ങൾക്കൊരു സ്വീകരണം തരാൻ തയ്യാറായിട്ടില്ല.അത് കൊണ്ട് ഞങ്ങൾ കുറച്ചു പേർ ചേർന്ന് നിങ്ങൾക്കൊരു സ്വീകരണം തരാൻ ആലോചിക്കുന്നു എന്ന്.  പക്ഷെ ഒരു നിബന്ധനയുണ്ട്. നിങ്ങൾ മുൻകൈ  എടുത്ത്  മമ്മൂട്ടിയെയും,  മോഹൻലാലിനെയും  കൂടി കൊണ്ട്  വരണം ഇത് പറഞ്ഞു തീരും മുൻപ്  ഞാൻ പറഞ്ഞു ‘അങ്ങനെയൊരു സ്വീകരണം  എനിക്ക് വേണ്ട’. ഞാൻ എന്തായാലും  എന്റെ റിസ്കിൽ  അത് ചെയ്യില്ല നിങ്ങളാണ് അത് ചെയ്യേണ്ടത്. എന്നെ അനുമോദിക്കുന്ന ചടങ്ങിൽ  മോഹൻലാലിനെ വിളിച്ചാൽ  ഉറപ്പായും അദ്ദേഹം വരും. പക്ഷെ ഞാനല്ല  അത് ചെയ്യേണ്ടത്. എനിക്ക് സ്വീകരണം തരുന്ന പാലാ മുൻസിപ്പാലിറ്റി ചെയ്യേണ്ട  കാര്യമാണതെന്ന് ഞാൻ അവരെ അറിയിച്ചു. അവർ  മോഹൻലാലിനോടും മമ്മൂട്ടിയോടും  കാര്യം പറഞ്ഞാൽ അവർ എത്തുമല്ലോ!. നിങ്ങളുടെ സൂപ്പർ ഹിറ്റ് സിനിമകളുടെ  ഈ സംവിധായകന് ഒരു സ്വീകരണം നൽകുന്നുണ്ട്. അതിൽ നിങ്ങളുടെ  സാന്നിദ്ധ്യം ആഗ്രഹിക്കുന്നുവെന്നും, നിങ്ങൾ പറയുന്ന ഡേറ്റിനും സൗകര്യത്തിനും അനുസരിച്ച് കാര്യങ്ങൾ ചെയ്യാം എന്നും അവരെ അറിയിച്ചാൽ  എന്തായാലും വരില്ലേ? ലോകത്തു മറ്റു ഏതൊരു  നടൻ വന്നില്ലെങ്കിലും  മോഹൻലാൽ വരുമായിരുന്നു’. പക്ഷെ ഞാനത് ചെയ്തില്ല- ഭദ്രന്‍ പറയുന്നു. .