സ്ത്രീകള്‍ക്കെതിരെയുള്ള ഡോ. രജിത് കുമാറിന്റെ പരാമര്‍ശങ്ങള്‍ ഏറ്റവുമധികം ചര്‍ച്ചചെയ്യപ്പെട്ട ദിവസം ഷോയിലുടനീളം അദ്ദേഹം കാത്തുസൂക്ഷിക്കാന്‍ ശ്രമിച്ച ‘മിസ്റ്റര്‍ പെര്‍ഫെക്ട്’ ഇമേജ് കൂടെയാണ് താളംതെറ്റിയത്. രജിത്ത് സ്ത്രീകളെക്കുറിച്ച് നടത്തിയിട്ടുള്ള മുന്‍ പരാമര്‍ശങ്ങള്‍ ജസ്ല ആയുധമാക്കിയപ്പോള്‍ വീണിടത്തുകിടന്ന് ഉരുളുകയായിരുന്നു രജിത്. തന്റെ നിലപാടുകള്‍ ചര്‍ച്ചചെയ്യപ്പെടുന്നു എന്നായപ്പോള്‍ വിഷയങ്ങളില്‍ നിന്നെല്ലാം ഒളിച്ചോടാനായിരുന്നു രജിത്തിന്റെ ശ്രമം. ഇതാണ് സുജോയുമായുള്ള വഴക്കില്‍ കലാശിച്ചത്.
ജസ്ല തന്റെ വാക്കുകളെ വളച്ചൊടിക്കുകയാണെന്ന രീതിയില്‍ രജിത് സ്വയം ന്യായീകരിക്കാന്‍ ശ്രമിച്ചപ്പോള്‍ ‘അന്ന് പറഞ്ഞത് എന്താണെന്ന് പറ’ എന്ന് തക്കസമയത്ത് സാന്‍ഡ്ര നടത്തിയ മറുചോദ്യം രജിത്തിന് രസിച്ചില്ല. സുജോയോട് സാന്‍ഡ്രയെ വിളിച്ചുകൊണ്ട് പോകാന്‍ പറഞ്ഞ രജിത്തിനെ സുജോ ചോദ്യം ചെയ്തപ്പോള്‍ ‘പെണ്ണാള’ എന്ന് വിളിച്ച് അധിക്ഷേപിക്കുകയായിരുന്നു ഡോക്ടര്‍. ഇതാണ് സുജോയെ പ്രകോപിപ്പിച്ചത്.
‘തനിക്കിട്ടൊരെണ്ണം തരേണ്ടിവന്നാല്‍ തന്നെ തീര്‍ത്തിട്ടേ ഞാന്‍ പോകൂ’, എന്നുപറഞ്ഞ് രജിത്തിന്റെ നേര്‍ക്ക് പാഞ്ഞടുക്കുകയായിരുന്നു സുജോ. ഇരുവരുടെയും കൊമ്പുകോര്‍ക്കല്‍ ദേഹോപദ്രവത്തിലേക്ക് പോകുമെന്ന് തോന്നിച്ചെങ്കിലും വീട്ടിലെ മറ്റ് അംഗങ്ങള്‍ ചോര്‍ന്ന് പിടിച്ചുമാറ്റി. സുജോയോട് പറഞ്ഞത് തമാശയായിരുന്നെന്നാണ് രജിത് പിന്നീട് നടത്തിയ ന്യായീകരണം.
വാദപ്രതിവാദങ്ങള്‍ക്കിടയില്‍ ഏറ്റുമുട്ടേണ്ടിവന്നെങ്കിലും ലക്ഷ്വറി ടാസ്‌ക് വന്നപ്പോള്‍ രജിത്തിനെ പരിചരിക്കാന്‍ സുജോ യാതൊരു മടിയും കാണിച്ചില്ല. രജിത്താകട്ടെ കിട്ടിയ അവസരം മുതലെടുത്ത മട്ടായിരുന്നു. ലക്ഷ്വറി ടാസ്‌കില്‍ ഫൈവ് സ്റ്റാര്‍ ഹോട്ടലായി മാറിയ ബിഗ് ബോസ് ഹോട്ടലിലെ സ്പാ ജീവനക്കാരനാണ് സുജോ. അതുകൊണ്ടുതന്നെ അതിഥിയായെത്തിയ രജിത് കുമാര്‍ സുജോയെക്കൊണ്ട് പെഡിക്യൂര്‍ ചെയ്യിക്കുകയായിരുന്നു. ഒറ്റ ഇടിക്ക് ഉറക്കികിടത്തുമെന്നൊക്കെ പറഞ്ഞ സുജോയോടുള്ള മധുരപ്രതികാരമായും ഇത് കണ്ടിരിക്കാം.
Post Your Comments