ബിഗ് ബോസ് വീട്ടില്‍ ഇതിനോടകം ഏറ്റവുമധികം ആരാധകരെ സമ്പാദിച്ച മല്‍സരാര്‍ത്ഥികളില്‍ ഒരാളാണ് ഡോ രജിത് കുമാര്‍. അതുകൊണ്ടുതന്നെ പുതിയ അധ്യായത്തിലേക്കുള്ള ബിഗ് ബോസിന്റെ പ്രമോ കണ്ട ആരാധകര്‍ ഒന്ന് ഞെട്ടിയിരുന്നു. ഇഷ്ട മല്‍സരാര്‍ത്ഥിയുടെ കരച്ചില്‍ എന്തിനാണെന്നറിയാനുള്ള ആകാംഷയിലായിരുന്നു എല്ലാവരും.
അമ്മയുടെ വേര്‍പാടിനെക്കുറിച്ച് പറഞ്ഞാണ് രജിത് കുമാര്‍ വികാരഭരിതനായത്. പിത്താശയത്തില്‍ കല്ല് ഉണ്ടായതിനെതുടര്‍ന്നാണ് അമ്മയെ ആശുപത്രിയില്‍ കൊണ്ടുപോയതെന്ന് പറഞ്ഞ് എലീനയോട് കാര്യങ്ങള്‍ വിവരിക്കുകയായിരുന്നു രജിത്. “സര്‍ജറിക്ക് സമ്മതിക്കാതിരുന്ന അമ്മ ഒടുവില്‍ വേദന താങ്ങാനാവാതെ സര്‍ജറി ചെയ്യാമെന്ന് ഇങ്ങോട്ട് ആവശ്യപ്പെട്ടു. അപ്പോഴേക്കും അമ്മയുടെ ലിവറിനെ മൊത്തമായും അത് ബാധിച്ചിരുന്നു. ഒരു മാസത്തിലധികം ആശുപത്രിയില്‍ കിടന്നതിന് ശേഷം അമ്മയുടെ സര്‍ജറി നടത്തി. സര്‍ജറിക്ക് ശേഷം പുറത്തെടുത്ത കല്ലുകള്‍ എന്നെ കാണിച്ചു. ചിത്രത്തില്‍ ഞാന്‍ കണ്ടു എന്റെ അമ്മയുടെ ലിവര്‍ പൊട്ടിപ്പൊളിഞ്ഞ് തകര്‍ന്നിരിക്കുന്നു”.
സര്‍ജറിക്ക് ശേഷമുള്ള ഒരു ദിവസം അമ്മ വേദന അറിഞ്ഞില്ലെങ്കിലും അമ്മയുടെ കിഡ്‌നിയുടെ പ്രവര്‍ത്തനം മോശമായിരുന്നു. ഡയാലിസിസ് ചെയ്യാം എന്ന് ഡോക്ടര്‍മാര്‍ നിര്‍ദേശിച്ചിരിക്കുമ്പോഴാണ് ഒരു ദിവസം വൈകിട്ട് ഏഴ് മണിയായപ്പോള്‍ അമ്മയെ പൊതിഞ്ഞെടുത്തത്.
താന്‍ വളരെ സ്‌ട്രോങ് ആണെന്നും ഒരിക്കലും കരയില്ലെന്നും രജിത് പറയുന്നുണ്ട്. തലയറുത്തിട്ടാലും കരയില്ലെന്ന് പറഞ്ഞെങ്കിലും അടുത്ത നിമിഷം വിങ്ങിപ്പൊട്ടുകയായിരുന്നു അദ്ദേഹം. സ്‌ട്രോങ് ആണെങ്കിലും അമ്മയുടെ കാര്യത്തില്‍ താന്‍ തളര്‍ന്നു പോകുമെന്ന് രജിത് പറയുന്നു. എലീന രജിത്തിനെ സമാധാനിപ്പിക്കുന്നതും കാണാം. അമ്മയ്ക്ക് വേണ്ടിയാണ് താന്‍ ജീവിച്ചതെന്നും അവസാന നാളില്‍ അമ്മയുടെ മലമൂത്ര വിസര്‍ജനം എടുക്കാന്‍ കഴിഞ്ഞത് തന്റെ ഭാഗ്യമാണെന്നും രജിത് പറയുന്നു.
Post Your Comments