ബിഗ് ബോസ് വീടിനുള്ളില്‍ സുജോയുടെ പ്രോട്ടീന്‍ പൗഡറിന് ആവശ്യക്കാരേറെയാണ്. സുജോയുടെ കണ്ണുവെട്ടുമ്പോഴെല്ലാം പ്രോട്ടീന്‍ പൗഡറില്‍ കൈയ്യിട്ടുവാരിയാണ് ഇവര്‍ സന്തോഷം കണ്ടെത്തുന്നത്. എന്നാലിപ്പോള്‍ ഈ പ്രോട്ടീന്‍ കള്ളന്‍മാര്‍ക്ക് തിരിച്ചൊരു പണിയുമായാണ് സുജോയുടെയും കൂട്ടരുടെയും വരവ്. എലീനയും പാഷാണം ഷാജിയുമാണ് സംഘാംഗങ്ങള്‍.
പ്രോട്ടീന്‍ കക്കുന്നവരില്‍ പ്രധാനിയായ ഫുക്രുവിനെയും കൂട്ടുപിടിച്ചാണ് ഇവർ പണിയൊപ്പിക്കാന്‍ പദ്ധതിയിട്ടത്. പ്രോട്ടീന്‍ പൗഡറില്‍ മുളകുപൊടിയും ഉപ്പും ചേര്‍ത്ത് നല്‍കാനായിരുന്നു പ്ലാന്‍. കാര്യങ്ങള്‍ ഫുക്രുവിനെ അറിയിച്ച് ഇവര്‍ ക്രമീകരണങ്ങളിലേക്ക് കടന്നു.
സംഭവങ്ങള്‍ക്കെല്ലാം ഒരു വിശ്വാസ്യത വേണമെന്ന് പറഞ്ഞ് പ്രോട്ടീന്‍ പാത്രം തുറന്നതും ആദ്യ വാ ഫുക്രു അകത്താക്കി. പകുതി വായില്‍ തന്നെ അവശേഷിപ്പിച്ച് മുളകുപൊടുയും ഉപ്പും ചേര്‍ക്കാന്‍ അടുക്കളയിലേക്ക് കടന്നു. ഫുക്രുവിന്റെ വകയായി കുരുമുളക് പൊടിയും കലക്കി. സുജോയോട് ടോയ്‌ലറ്റില്‍ പോകുന്നതായി അഭിനയിക്കാന്‍ പറഞ്ഞെങ്കിലും പ്രോട്ടീന്‍ പൗഡര്‍ കഴിച്ചയുടനുള്ള പ്രതികരണം നേരില്‍ കാണാനായിരുന്നു മസിലളിയന്റെ ആഗ്രഹം. ഇതോടെ പ്രോട്ടീന്‍ പൗഡര്‍ തീര്‍ന്നെന്നും അവസാന പങ്കാണെന്നും കഥ മെനഞ്ഞു.
പദ്ധതിയിട്ടതു പോലെ ഫുക്രു സംഭവം കൂടെയുള്ളവര്‍ക്ക് കൊടുക്കാനെത്തി. പതിവ് പ്രതികരണം തന്നെ, ആദ്യം ചാടിവീണത് മഞ്ജുവും വീണയും. ഇത്തവണ ടീമിലില്ലാത്ത മറ്റൊരാള്‍ കൂടെ ഇരയായി. ‘ഇതില്‍ ഉപ്പ് ചേര്‍ത്തിട്ടുണ്ടോ എന്ന് ആദ്യം ചോദിച്ചത് ആര്യയായിരുന്നു. ഇതോടെ വാഷ്‌ബേസിന് അരികിലേക്ക് കൂട്ടയോട്ടമായി.
പൊട്ടിച്ചിരിച്ച് വാ കഴുകി തിരിച്ചെത്തിയ മഞ്ജു വീണ്ടും കെണിയില്‍ വീണു. ഫുക്രു വായിലെ രുചി മാറട്ടെ ഇത് ശരിക്കുമുള്ളതാണ് എന്നു പറഞ്ഞ് നീട്ടിയപ്പോള്‍ സത്യമെന്ന് വിശ്വസിച്ച് വാ പൊളിച്ചു, മഞ്ജു വീണ്ടും പെട്ടു. ഇതോടെ ‘കടിഞ്ഞൂല്‍ പൊട്ടി’ എന്നാണ് ഫുക്രു മഞ്ജുവിനെ വിശേഷിപ്പിച്ചത്.
Post Your Comments