ബിഗ് ബോസിലെ ആറാം എപ്പിസോഡിൻ്റെ ഹൈലൈറ്റായിരുന്നു ധർമ്മജൻ്റെ എൻട്രി. വീട്ടിലെ ടോയ്ലറ്റുമായി ബന്ധപ്പെട്ട ചില സാങ്കേതിക പ്രശ്നങ്ങൾ പരിഹരിക്കാൻ എത്തിയ ടെക്നിക്കൽ ടീമിനോടൊപ്പമായിരുന്നു മുഖം മറച്ച് രഹസ്യമായി ധർമ്മജൻ്റെ എൻട്രി. എന്നാൽ ഒരു ടെക്നീഷ്യൻ മാത്രം പുറത്തു കടക്കും മുൻപേ ബിഗ് ബോസ് വീടിൻ്റെ മുൻവാതിലടഞ്ഞു. ഇതോടെ വീടിനുള്ളിൽ അങ്കലാപ്പായി. ഒരു ടെക്നീഷ്യൻ പുറത്തു പോകും മുൻപ് വാതിലടഞ്ഞെന്നും അയാളെ പുറത്തു വിടണമെന്നും പല അംഗങ്ങളും ക്യാമറയ്ക്ക് മുന്നിലെത്തി ബിഗ് ബോസിനോട് ആവശ്യപ്പെട്ടു. എന്നാൽ വാതിൽ തുറന്നില്ല.
ഇതിനിടയിലാണ് മുഖം മറച്ച ടെക്നീഷ്യൻ ധർമജനല്ലേ എന്ന് ചില വനിതാ അംഗങ്ങളുടെ മനസ്സിൽ സംശയമുയരുന്നത്. ഒന്നും സംസാരിച്ചില്ലെങ്കിലും ധർമ്മജൻ്റെ ശരീരഭാഷയായിരുന്നു സംശയത്തിന് പ്രധാനകാരണം. വൈൽഡ് കാർഡ് എൻട്രിയിലൂടെ ധർമജൻ ബിഗ് ബോസ് വീട്ടിലെത്തുമെന്നുള്ള റിപ്പോർട്ടുകൾ മുൻപ് വന്നിരുന്നതിനാൽ പ്രേക്ഷകരും ഇത് എളുപ്പത്തിൽ ഊഹിച്ചു. ഒടുവിൽ ഫുക്രുവിൻ്റെ മുന്നിൽ വെച്ച് രഹസ്യമായി ധർമ്മജൻ മുഖം മൂടിയൂരി. ഇതോടെ കെട്ടിപ്പിടിച്ചും കൈയ്യടിച്ചും ധർമ്മജനെ വീട്ടിലെ അംഗങ്ങളെല്ലാവരും സ്വാഗതം ചെയ്തു.
സാജു നവോദയയോടും തെസ്നി ഖാനോടും അവരുടെ വീട്ടിലെ വിശേഷങ്ങളും. ആര്യയും വീണയും കരഞ്ഞു കൊണ്ട് അനുഭവങ്ങൾ പങ്കുവെച്ചത് ടിവിയിൽ സംപ്രേഷണം ചെയ്ത വിവരവും ധർമജൻ അറിയിച്ചു. മത്സരാർഥികളെ അനുകരിക്കാനായിരുന്നു ധർമജന് ലഭിച്ച ടാസ്ക്. ഈ രംഗം വീട്ടിൽ ചിരി പടർത്തുകയും ചെയ്തു. എന്നാൽ കുടുംബാംഗങ്ങളുടെ സുഖവിവരം മത്സരാർഥികളെ അറിയിച്ചത് താരത്തിന് വിനയായി. ഇതോടെ അപ്രതീക്ഷിതമായി ഒരാൾ വീട്ടിൽ നിന്ന് പുറത്താകുമെന്നും മോഹൻലാൽ അറിയിച്ചു.
പുറത്തു നിന്നുള്ള വിവരങ്ങൾ ആരും അകത്തു പറയരുതെന്ന നിയമം ലംഘിച്ച ധർമജനോട് വീട്ടിൽ നിന്ന് ഇറങ്ങാനായിരുന്നു മോഹൻലാൽ ആവശ്യപ്പെട്ടത്. ഇതോടെ തെസ്നി ഖാൻ ഉൾപ്പെടെയുള്ള മത്സരാർഥികൾക്ക് സങ്കടം അടക്കാനായില്ല. എന്നാൽ ധർമജന് ഒരു ഗസ്റ്റ് റോൾ മാത്രമായിരുന്നു ഉണ്ടായിരുന്നതെന്നും വീട്ടിൽ നിന്ന് ഒരാൾ പുറത്തു പോകുമ്പോഴുള്ള വിഷമം മനസ്സിലാക്കാനാണ് ഇത്തരത്തിലൊരു രംഗം പ്ലാൻ ചെയ്തതെന്നും മോഹൻലാൽ പ്രേക്ഷകരെ അറിയിച്ചു. ഇതോടെ ധർമജൻ്റേത് ഒരു വൈൽഡ് കാർഡ് എൻട്രിയല്ലെന്ന് ഉറപ്പാകുകയായിരുന്നു.
Post Your Comments