രാജസേനന്റയെ ഹിറ്റ് ചിത്രത്തിന്റയെ രണ്ടാം ഭാഗം എടുക്കാൻ ഒരുങ്ങി മാണി സി കാപ്പൻ

രാഷ്‌ട്രീയ നേതാവ്, എം.എൽ.എ എന്നീ നിലകളിൽ എത്തുന്നതിന് മുമ്പു തന്നെ സിനിമയെ ഹൃദയത്തോട് ചേർത്തുവച്ചയാളാണ് മാണി സി കാപ്പൻ. നിർമ്മാതാവ്, അഭിനേതാവ്, സംവിധായകൻ എന്നീ നിലകളിൽ തന്റെതായ സംഭാവനകൾ അദ്ദേഹം മലയാള സിനിമയ്‌ക്ക് നൽകി കഴിഞ്ഞു. മേലേപ്പറമ്പിൽ ആൺവീട്, മാന്നാർ മത്തായി സ്പീക്കിംഗ്, സി.ഐ.ഡി ഉണ്ണികൃഷ്‌ണൻ ബി.എ, ബി.എഡ് തുടങ്ങിയ തൊണ്ണൂറുകളിലെ പല ഹിറ്റ് ചിത്രങ്ങളും നിർമ്മിച്ചത് മാണി സി കാപ്പനായിരുന്നു.

ഇപ്പോഴിതാ സൂപ്പർഹിറ്റ് ചിത്രമായ മേലെപറമ്പിൽ ആൺവീടിന് രണ്ടാംഭാഗം ഒരുക്കുമെന്ന് പ്രഖ്യാപിച്ചിരിക്കുകയാണ് അദ്ദേഹം. കൗമുദി ടിവിയ്‌ക്ക് നൽകിയ അഭിമുഖത്തിലാണ് മാണി സി കാപ്പൻ   ഈ കാര്യത്തെ കുറിച്ച് പറഞ്ഞത്.

‘മേലെപറമ്പിൽ ആൺവീടിന് രണ്ടാംഭാഗം ഒരുക്കണമെന്ന് തീരുമാനിച്ചിട്ടുണ്ട്. തിരക്കുകളൊഴിഞ്ഞ് കാശും കൈയിൽ വന്നാൽ, ഒരു പ്രോപ്പർട്ടി വിൽക്കാനുണ്ട്. അത് വിൽക്കുന്നത് വരികയാണെങ്കിൽ പടം എടുക്കും. പഴയ മേലെപറമ്പിൽ ആൺവീടിന്റെ ബേസിക് ത്രെഡ് തന്നെയാണ്. പക്ഷേ ഫസ്‌റ്റ് ഹാഫ് ടോട്ടലി മാറ്റമുണ്ട്. മലയാള പയ്യൻ ഗോവയിൽ ചെന്ന് ഹിന്ദിക്കാരി പെണ്ണിനെ കല്യാണം കഴിച്ചു കൊണ്ടു വരുന്നതാണ്’ മാണി സി കാപ്പൻ പറഞ്ഞു.