അമ്മയാകണമെന്ന ആഗ്രഹവുമായി രഞ്ജു രഞ്ജിമാർ ; താരത്തിന് ആശംസകൾ നേർന്ന് ആരാധകർ

ട്രാൻസ് ജെൻഡറും സെലിബ്രിറ്റികളുടെ മേക്ക് അപ് ആർട്ടിസ്റ്റുമായ താരമാണ് രഞ്ജു രഞ്ജിമാർ.  ബിഗ് സ്ക്രീനിലെ പ്രമുഖ താരങ്ങളെ അവരുടെ ബിഗ് ഡേയിൽ സുന്ദരീമണികളാക്കി അണിയിച്ചൊരുക്കുന്നത് രഞ്ജു ആണ്. തങ്ങളുടെ മെയ്ക് അപ് ആർട്ടിസ്റ്റ് രഞ്ജു ആണെകിൽ യാതൊരു ടെൻഷനും ഞങ്ങൾക്കില്ല എന്നാണ് പൊതുവെ എല്ലാ താരങ്ങളും പങ്ക് വയ്ക്കുന്നത്.

രഞ്ജു ഈ നിലയിലേക്ക് എത്തിയത് ഒരുപാട് കഠിനാധ്വാനങ്ങളുടെ ഫലമായിട്ടാണ്. സ്വന്തം സ്വത്വം തിരിച്ചറിഞ്ഞപ്പോൾ മുതൽ ഈ നിലയിൽഎത്താനായി ഒരുപാട് കഷ്ടപ്പാടുകൾ താണ്ടിയാണ് ഇന്ന് സെലിബ്രിറ്റികളുടെ മേക്ക് അപ് ആർട്ടിസ്റ്റായി രഞ്ജു മാറുന്നത്. കൊല്ലത്തിലെ ഒരു സാധാരണ ഗ്രാമത്തിൽ ജനിച്ചുവളർന്ന രഞ്ജു കൂലിപ്പണിക്കാരനായ പിതാവിന്റെയും കശുവണ്ടി ഫാക്ടറി തൊഴിലാളിയായ മാതാവിന്റെയും നാലാമത്തെ കുഞ്ഞായാണ് ജനിച്ചത്. താൻ നേരിട്ട ആക്ഷേപങ്ങളും അപഹാസ്യങ്ങളുമാണ് താരത്തെ ഇത്രത്തോളം ഉയർത്തിയത്.

സോഷ്യൽ മീഡിയയിൽ സജീവമായ താരം തന്റെ വർക്കുകളും പേർസണൽ നിമിഷങ്ങളും പ്രേക്ഷകർക്കായി പങ്ക് വയ്ക്കാറുണ്ട്. ഇതിനിടയിലാണ് തനിക്ക് അമ്മയാകണം എന്ന ക്യാപ്ഷ്യനോടെ ഒരു വീഡിയോ രഞ്ജു പോസ്റ്റ് ചെയ്തിരിക്കുന്നത്. ഒരു പാവയെ മാറോട് ചേർത്ത് അതിനൊപ്പിച്ച് മനോഹരമായ ഒരു ഗാനമാണ് ടിക് ടോക്കിലൂടെ താരം അവതരിപ്പിക്കുന്നത്. സ്ത്രീയായി ജനിക്കുന്ന ഏതൊരാളുടെയും ഉള്ളിൽ അടങ്ങിയിരിക്കുന്ന മാതൃഭാവമാണ് രഞ്ജുവിന്റെ ഭാവങ്ങളിൽ നിന്നും ആരാധകർ വായിച്ചെടുക്കുന്നത്.

ഞങ്ങൾ എല്ലാം മക്കൾ അല്ലെ അമ്മയുടെ എന്ന് ചോദിച്ചുകൊണ്ട് ചിലർ കമന്റുകൾ പങ്ക് വയ്ക്കുമ്പോൾ മറ്റ് ചിലർ താരത്തിന്റെ എല്ലാ ആഗ്രഹങ്ങളും സഫലമാവട്ടെ. ദൈവത്തിന്റെ അനുഗ്രഹവും ഞങ്ങളുടെ പ്രാത്ഥനയും എന്നുമുണ്ടാവും അമ്മയാകാൻ സാധിക്കട്ടെയെന്നാണ് ആശംസിക്കുന്നത്.